薛凱琪奔波養家抗拒桃花

Fiona、大同率師弟妹周柏豪、周子揚、連詩雅（Shiga）跟東方讀者拜年，內地劇一個接一個的Fiona狂賺人仔，她笑說：「我都要養家。」雖然忙搵錢，但Fiona於年中推出的新碟，已經跟公司講掂數，寧願自己奔波辛苦也會返港宣傳造勢，她說：「做咗隻碟都唔想嘥咗心血。」事業如意的她，桃花也盛，跟公司肥仔監製傳出緋聞，她笑說：「佢唔係我朵桃花，我唔要惹桃花，桃花唔代表好，我要愛情、姻緣，最緊要專一及人品好，好似好簡單，其實已經好難。」

去年舉行超過廿場巡迴演唱會的大同，被形容為華納最賺錢的歌手，他說：「咁又唔好咁講。」因為奔波勞碌，去年曾經爆肺的他，被笑指財多身子弱，Fiona在旁哈哈大笑說：「嘩！你有錢到爆肺。」笑爆全場，大同笑言去年在天空飛的時間比在陸地多，他已經很久沒有放假，他說：「唔係誇，爆肺休養當放咗假，三年前買嘅DVD，依家先睇到。」今年他的工作表也排得密麻麻，並於年底會再舉行演唱會。

（左起）連詩雅、周柏豪、薛凱琪、方大同、周子揚

方大同趁休養期間好好休息放假

柏豪新年照開工

剛過去在樂壇頒獎禮獲獎的柏豪笑言：「攞完獎嘅餘溫、激情仲未過。」新年他會在錄音室照常工作，希望再創佳績。潮州人的周子揚，因父親是生意人，新年會做足傳統，他說：「初一至初七都會着住新紅底。」而Shiga入鄉隨俗今年會大派開工利是。

化妝：Jessica Chan（Fiona、大同及子揚）、German（柏豪）、Kris Wong（Shiga）

髮型：JO Lam＠Stage（Fiona）、Carr＠P.O.P（大同）、Cliff Chan＠Hair Corner（柏豪）、Mike＠P.O.P（Shiga）、Cooney＠P.O.P（子揚）

文：音樂組

攝：唐豁莊