溫拿爆情史 阿倫捱打尷尬
溫拿樂隊前晚年初二開騷，五子準備巨型魚網撈利是，又在台上互爆情史！當中譚詠麟慘遭圍插，被鍾鎮濤和陳友「唱」他為繼後香燈而陷於兩個愛人之間，阿倫即面露尷尬之色，新年流流認真口不擇言。
溫拿一連六場紅館演唱會前晚開鑼，九時四十五分開騷，唱足三小時，全場爆滿。適逢新正頭，五子甫開場即以巨型魚網撈觀眾利是，大唱經典歌曲，而一向寡言的葉智強、彭健新及陳友亦以爆炸頭造型又唱又跳，非常驚喜。
陳友似老夫子
溫拿五虎在台上互爆情史，以歌曲互窒對方，更新年流流口不擇言。阿倫說：「健仔對住個老婆好似隻死狗咁！冇晒地位，日日哦，搞到健仔得到個重病─氣管炎（普通話音：妻管嚴）！」他又笑陳友似老夫子、阿強是千年口，但最終阿倫慘成箭靶，輪流被隊友取笑。
鍾鎮濤唱歌揶揄阿倫：「Torn between two lovers，feeling like a fool, loving both of you is breaking all the rules.（意為：兩愛人之間拉扯，感覺很蠢鈍，犯規地同時愛着你們）」陳友亦說：「犯規都有原因嘅，阿倫係屋企獨仔，要保守一啲傳統規範，要繼後香燈！」故陳友決定唱《Happy Together》，慘被「唱」的阿倫一臉尷尬地說：「大家千祈唔好學，呢排有辦你睇！」
攞個心出嚟講
完騷後，五子以新年look接受訪問，陳友說：「原本呢part係我負責講嘅，但就改咗少少，佢哋叫我小心啲講，我咪攞個心出嚟講囉！講開咁好笑，聽晚繼續。」問阿倫是否不高興？他表示：「見仁見智啦！本身有綵排前面嗰part，唔知無喇喇加插啲嘢！（有辦睇係指邊個？）唔好講人哋嘅事，冇講人冇講名，唔好諗多咗！」
文：音樂組