黎耀祥糕招迎春念親恩
黎耀祥很喜歡農曆新年的感覺，尤其是年輕時的新年，雖然所有店舖都關門，不過那份過時過節的熱鬧氣氛，比現時有過之而無不及。而祥仔與太太Julia往年都甚少行花巿，不過秉承祥仔母親的傳統，他們每年都會親自炮製幾底蘿蔔糕，今次更親自為本報示範。
有板有眼
拍照時，見祥仔煎糕時有板有眼，說到整蘿蔔糕的材料，他謂︰「每逢過節都會特別掛住阿媽，以前阿媽會自己整蘿蔔糕、角仔，全盒所有嘢又會好齊全，細個年年都會跟大隊一齊去大伯父、二伯父屋企拜年、逗利是，真係好開心，不過呢兩年都要出外登台，屋企全盒冇擺，又唔會有人嚟拜年，最多都係約阿哥、家姐食飯，可能阿媽唔喺度啦！有老人家喺屋企，凝聚力大啲嘅。」
撇甩囝囝
而過往兩年，祥仔都要往內地登台兼過農曆新年，今年亦一樣，他與太太將於年三十晚出發到馬來西亞，之後再到美加登台搵真銀，至於囝囝就會留在香港過新年。
祥仔謂︰「個仔要趕住返學，所以都跟唔到我哋去，本來想同太太留多幾日美加探親友，但係我又要返嚟開劇，我都同老婆講，以後新年都係請定假，抖吓都好呀！」