呂慧儀出線阿澤晒股

賀歲片《我愛HK開心萬歲》前晚舉行首映，現場布置隆重，並鋪上紅地氈，監製曾志偉率領李治廷、陳法拉進場，期間還有醒獅助興，吳君如、林欣彤、馬賽、苟芸慧、徐子珊、吳卓羲、林峯、鄭欣宜等近百藝員出席，場面熱鬧。

志偉勁敵黃百鳴亦單拖「踩場」，志偉見狀即忍不住寸他人丁單薄，不過百鳴亦唔執輸反窒志偉：「我撐場真係撐到底，唔會着住《我》片宣傳衫，你知唔知人哋以為入錯場，即刻掉頭走吖！」及後志偉打圓場表示祝大家也票房大賣。

黃百鳴（中）單拖踩志偉場，二人互窒，場面搞笑。

《我》片前晚首映，眾女星性感上陣。

一吋長一吋強

一眾女星當中，子珊、沈卓盈、馬賽等均性感上陣，不過當中以兩位「咪神」呂慧儀、高海寧最為搏命，率先到場的高海寧以吊帶低胸紅裙亮相，被問到有否信心撼贏呂慧儀？她笑謂：「冇話邊個贏邊個，着衫係睇襯唔襯大會主題。」

阿澤在《最強囍事》中大膽露股，嚇窒熊黛林。

放大圖片

雖然高海寧事業線不俗，不過也不及穿上桃紅色低胸長裙的呂慧儀澎湃，力谷北半球，問到其事業線是否有4吋之多？呂慧儀嬌嗲謂：「你估1吋長1吋強咩，嗰啲係講腳嘅，唔係講呢啲，今晚場合隆重，所以先着成咁。」

君如除褸迎戰

至於有份參與《我》片的君如，雖然切合大會主題以紅色服飾出席，但外面卻穿上狀似Fur的外套，被取笑性感度不如後輩，對此君如哈哈大笑謂：「畀啲生力軍上啦！（你大細超，陳可辛嘅戲就性感！）陣間就除件嘢，呢件係環保，古董嚟o架！」

此外，杜汶澤在賀歲片《最強囍事》中露股剝光豬演出，拍攝前他與導演已溝通好，但熊黛林以為只是被整蠱，到真正拍攝時被眼前一切嚇窒不懂反應，只識得大叫大跳。事後阿澤表示：「佢好真情流露，效果好好。」

文：影視組