DaDa兔年許願賺夠一億
施念慈（Celia）與旗下模特兒吃團年飯，又大派利是，陳靜（DaDa）即賣口乖，發誓會好好工作，以報答Celia栽培之恩，DaDa更許下宏願，要賺夠一億元。
Celia率領公司一眾o靚模DaDa、李宥彤（Liz）、梁雅淳（Bambi）（前名梁筠兒）、蔡瑩瑩（Ivy）、鄧伊玲（阿旦）、梁郁霖（Lillian）、鍾永慧（Iris）等吃團年飯慶祝新年，以慰勞她們一年來的辛勤。席間八女有說之不盡的話題，雞啄唔斷，非常熱鬧！
趁樓市旺換大屋
DaDa發誓會好好工作報答Celia，在新一年更許下賺一億元的宏願：「賺愈多愈好，賺夠一億，不過係分十年。（搵錢大計？）投資上，如果有個好價錢就賣樓，趁樓市旺換大屋，用錢搵錢，仲想賺人仔（人民幣），所以來年會發展內地市場，終極寫真喺上海取景去迎合內地fans。」她打算趁年輕搏命搵錢養家，在兔年亦會轉型做歌手及演員。
提起團年飯，DaDa笑言：「我每年都會返上海同屋企人食團年飯，仲會同婆婆一齊整八寶飯、包雲吞同整酒釀丸子，同親戚朋友一齊分享！」
當餸菜陸續送上餐桌，大家即進入作戰狀態，她們都爭着夾餸給Celia，實行谷肥她，但Liz亦不忘賣口乖：「希望Celia愈來愈瘦！」
獨門秘方催桃花
一輪衝鋒陷陣，枱上食物一掃而空，Celia隨即拿出利是派給她們，Celia對她們說：「希望你哋愛情、事業兩得意！我畀你哋拍拖o架，因為拍拖會令女仔變靚，不過最重要係一定要正桃花，同埋一定要畀我過目，要過到我嗰關先得。」Bambi更透露Celia傳授給她們催桃花的獨門秘方：「佢教我哋要圍住棵大桃花，順時針方向轉三圈，轉啲桃花運返嚟！我決定今年一定會叫埋啲朋友一齊咁做，好想快啲有拖拍！」