李彩華篤魚蛋醫肚
出名孝順的李彩華（Rain），日前陪媽咪到銅鑼灣辦年貨，她除細心為媽咪量尺碼外，亦做埋「阿四」幫手拿戰利品；雖然Rain對媽咪出手闊綽，但自己卻慳妹上身，連一件約八千元的外套也不捨得買。
入行十一年的李彩華（Rain），十六歲出道時已開始代父親償還過百萬債項，獨力撐起成頭家，故她多年來絕不胡亂揮霍，十分慳家。自她近年主攻內地市場拍劇搵人民幣後，單是出席公開活動已獲六位數字酬勞，總算捱出頭來。
樂做孝順阿四
日前下午2時半，身穿毛毛外套的Rain，做乖乖女陪媽咪到銅鑼灣四出購物，期間閒逛電器用品店時，對手機和電腦特別有興趣，但最終揀不到心頭好。行到慶合合的Rain，在街上大方脫去外套，僅穿小背心，露出白滑雙臂，並翹住媽咪到附近買街頭小食，更放下明星架子，懶理途人目光，大街大巷篤魚蛋，一口一粒，吃得津津有味！
醫肚後，母女二人進入附近的家庭用品店閒逛，但未有斬獲，之後再戰另一大型商場睇衫。期間Rain親自為媽咪挑選靚衫，還不時為媽咪度身，盡顯孝心，並二話不說掏出錢包買下數件靚衫送給媽咪。之後Rain又帶媽咪去買電話，李媽媽極速睇中一部粉紅色電話，Rain即扑錘着店員包起，並做埋「阿四」為媽咪拿取戰利品。
自認精打細算
拿着一袋二袋的Rain，辦完年貨便與媽咪分道揚鑣，獨自到附近名店睇衫，期間她對一件價值八千多元的透明膠外套情有獨鍾，並即場試穿，又埋鏡左照右照，但最終沒有購下。其後又到下層CHANEL化妝品專櫃，火速買了一支粉藍色指甲油便轉身走人。
事後記者致電Rain，她坦言：「前排我成日喺外地做嘢，難得返嚟就陪吓媽咪，只要媽咪鍾意我都會買。（唔捨得買畀自己？）咁都畀你哋見到。其實我都好勤力賺錢架，不過平時就好精打細算。我唔係唔捨得買，要睇吓係咪有需要先買，嗰日我係想買衫做嘢，但係件衫八千幾蚊好唔抵！」
文、攝：追蹤組