志偉谷戲擺賭王上枱
曾志偉辦妥爸爸的喪事後，隨即歸隊率領十多位演員落旺角為電影宣傳。對於近日熱爆全城的何家爭產風波，佔據了各大報章的版位，志偉不擔心影響新片宣傳，更搞笑地稱只得沖涼房和廚房「兩房」，實行借賭王新聞谷新片。
曾缺席新片宣傳辦理爸爸後事的志偉昨歸隊，與吳君如率領《我愛HK開心萬歲》演員林欣彤、王祖藍等到旺角宣傳，向群眾派揮春及利是封，所到之處都引來小混亂。問到覺不覺被賭王何鴻燊家族爭產新聞及無綫股權變動影響宣傳？他說：「唔會，我咪當係幫我宣傳囉！黃百鳴問我去唔去睇《最強囍事》首映，我今晚都會帶埋成班演員去踩場。」
父親在港無產業
問志偉有否賭王的煩惱時，他笑言：「我冇咁多房又冇咁多錢，得兩房，沖涼房同廚房，其實夠就開心啦！（你點分配？）得咁少錢，啲律師費仲多過我啲錢，使乜分配吖，不過最開心係啲仔女個個都自力更生。」提到他爸爸的遺產，志偉坦言一早已被廉政公署充公，爸爸在香港並無產業。志偉表示：「一切都係我白手興家o架！我由五蚊臘鴨起家，有個名叫『臘鴨偉』，爸爸就算有錢都係我畀佢，佢唔喺度應該留畀我個女。」
叫阿倫破壞亞視
此外，有指志偉好友陳國強成無綫新老闆後，邀他及陳百祥協助打天下，志偉否認其事：「梗係唔係！我唔係行政人員，唔鍾意做幕後，阿叻就似做軍師，口噏唔使負責任嘛，叫埋阿倫去亞視，因為佢有破壞冇建設。」志偉坦言自己不是管理層材料，過往雖做過生意，但百多萬的生意跟無綫百多億生意難相提並論。
文：影視組