克勤狂踩屎：多得阿倫抹

左麟右李難得聚首，今次唔係開演唱會，而是由譚詠麟訪問經歷高低起跌的李克勤，由走紅後將自己放到無限大，到演唱會冇人睇、頒獎禮捧蛋的一沉百踩日子，要阿倫出手幫他抹屎才得以翻生。

倫：譚詠麟

克：李克勤

新丁入行心理唔平衡

倫：今日想問你一樣嘢——平衡，你新丁初入呢行時，寶麗金咁多artists，粒粒巨星，自己點平衡心態？

克：第一次簽約18歲都未夠，乜都唔知一舊雲，聽到寶麗金三個字都嚇暈，一間超大規模唱片公司，原來我有份喎，以前電視睇嗰啲全部變咗同事喎，嘩！完全唔識得諗，嗰時仲讀緊中六，心理好唔平衡，樣樣都好新鮮，當時寶麗金真係一個大家庭，國際公司做reception嘅都好似麥當娜咁着到好行，豹紋咁返工，哈哈，送信哥哥仔又一齊踢波，好大嘅super star小鳳姐（徐小鳳）又請我哋去玩，成間公司好似family，頭幾年乜都唔識，淨係覺得好好玩。

前輩畀意見

倫：咁你入錄音室，有冇發覺同平時唱歌唔同？

克：只記得一隻歌錄好耐，幾日嘅，開頭真係唔習慣，第一次喺收音機聽到自己首歌《手錶》，咦！咁鬼似譚詠麟嘅，自己聽番都覺得好似，但錄時一啲都唔覺，直到第三隻碟開始知道乜嘢叫錄音，好多前輩走嚟睇我呢個o架仔錄音，畀好多意見，你都有嚟。

倫：你點平衡啲意見呢？實有出入o架？

克：聽囉，乜都唔識梗係聽人講，到《大會堂演奏廳》開始知道原來可以咁唱，以前唔識點唱，聽唱片好似執藥咁，攞人哋呢句嗰句，炒埋一碟。

李克勤

譚詠麟

初次攞獎感自大

倫：呢個就係最早期心態，完全冇平衡，到你第一次攞獎時，心態係點樣？

克：到攞獎開始真係唔平衡，嗰時應承咗阿媽，《大會堂演奏廳》呢張碟唔得就去讀書。

倫（大笑）：哈哈哈哈。

克：好彩得啫，嗰時同TVB拍咗套劇，連埋隻碟一齊上，開始賣白金唱片，開始攞獎。

倫：第一個獎係邊隻歌？

克：《一生不變》攞十大中文金曲，你頒獎畀我，我仲記得買咗件好貴嘅衫，覺得貴就係好，開始踏入心理上唔係好平衡時間，將自己放到無限大，覺得自己樣樣都得，因為身邊所有人話得，又開始攞獎，覺得好似好容易咁。

克（扮輕佻語氣）：以前喺電視見到攞乜金曲、金唱片，都唔係好難啫，嗰時開始有咁心態，睇雜誌又吹捧，話接班人呀，嗰段時間都有幾年係唔平衡，心理上自己接受唔到，突然之間嗰步檻得咁快，包括人哋點睇自己，自己點睇自己，以前買呢樣嘢要儲好耐錢，依家除咗買呢樣可以買埋嗰樣，太短時間得到太多嘢，當時只係20歲，完全唔適應，平衡唔到心態。

倫：咁會唔會自大呢？

克（自揭瘡疤）：得罪好多人，自己講嘅嘢唔覺，但啲人覺得好難聽，呢個世界好公平，踩屎好容易，要抹番好難囉，花好長時間抹番，嗰時得罪好多人，經過好長時間觀察至做番朋友，我覺得係一個必經階段。

倫：你知唔知，你瀨咗屎，我同你抹屎？

克（一面感激）：我梗係知，幾多人幫我，好多。

倫（取笑）：我同你夾左麟右李時，啲記者行家數到你……數好多嘢出嚟，哈哈。

克（嘆氣）：所以屎好容易踩，要抹番好難，自己講一句說話，人哋擺咗入腦，要做番好多好嘢，先冚番啲壞印象。

家庭第一

倫：跟住冇嘢啦，左麟右李，到你結婚，喺家庭生活方面點去平衡工作呢？

克：依家平衡要喺時間上，工作始終要做，由以前男朋友到依家丈夫、爸爸嘅身份，男人係家庭經濟支柱，負最大責任嘅角色，工作帶畀自己滿足感，仲係經濟來源，工作一定要做，其他時間分配一定係家庭擺第一，仲會做咁多私人嘢咩，好自然地將工作以外時間畀晒家庭。

倫（心有同感）：無可厚非。

克勤與盧淑儀幾時都咁恩愛。

有子萬事足的克勤，與大仔Ryan在新加坡度假戲水。

克勤自揭當年高低潮經歷，幸好fans不離不棄支持。

無綫打救粉絲不棄

倫：娛樂圈就係咁，第一個印象畀人好緊要。呢個係你初初變自大、失控冇咗平衡力，到後來當你遇到挫折，演唱會、唱片唔同以前，你用乜心態去平衡？

克：難過實有，最簡單攞咗幾年金曲，之後自己度定期去，但有得去卻冇獎攞，都未算衰喎，到有一、兩年，（扮驚聲）點解唔使嗌我去嘅？係咪周國豐唔記得打畀我呀？直頭係唔記得你，唔算係一個卡士，嗌你去係有份參加比賽，不過輸咗畀人啫，唔嗌你去直頭覺得你冇份比賽，最壞係呢兩年，開頭當然好唔習慣。

倫：有冇諗過返去讀書？

克：咁又冇，攞唔到金曲頭一、兩年，成日打電話返公司埋怨，唔覺得自己問題，只覺得點解唱片公司唔同我fight呀？之後開始接受娛樂圈起跌係咁，嗰時ＴＶＢ真係好，搵我做咗好多好有意義嘅《勁歌金曲》、《香港小姐》、《世界盃》，做呢啲節目keep住開心心態，又真係幾好玩，雖然啲人問個個禮拜我同呂方攞住滅火筒噴人，你又冇歌唱，新人都有歌唱，你有冇心酸？我完全冇又唔係，但識得崗位唔一樣就要調節，坦白講冇諗過做完世界盃有人鍾意李克勤講波而買我唱片，冇諗咁長遠，有嘢就做，反正咁得閒，當然歌迷都扮演重要角色，咁多年就算最低潮都叫我唔好放棄。

倫：咁你咁耐以嚟有冇收埋歌迷啲信？低潮時有冇一、兩封信touch到你？

克：通常睇完擺喺心就算，反而有次好深刻，拍完嘢天光去食早餐，隔籬枱有個廿幾歲男仔攞ＣＤ畀我簽名，晨早６點鐘，佢話好鍾意聽我歌，唔好放棄，令我好記得。

倫：到後來慢慢啲嘢上番嚟。

港樂騷起死回生

克：港樂係轉捩點，多得你介紹，推薦話啲歌啱用。嗰個演唱會好重要，衝破咗我心理障礙，之前６、７年一直唔敢開演唱會，因對上一個賣得好差，直頭驚咗。嗰個（港樂）係個轉捩點，觀眾覺得克勤同管弦樂團可以擺埋一齊，個騷係成功，令到大家重新覺得李克勤可以唱歌。不過當時唱片公司老細陳少寶話：「吓，港樂仲要出隻Live CD？唔好啩，蝕錢喎！」嗰時好多人幫手同佢講。

倫（餘怒未消）：我直情話佢有冇搞錯。

克：終於隻碟賣得好好，由嗰時開始啲人慢慢返嚟。