官恩娜發燒冇心機咀仔

官恩娜、鄭融及樂隊RubberBand等昨日出席在馬場舉行的「環保音樂會」，患感冒的官恩娜戴口罩現身，幸好未有影響演出，她表示前晚已發燒狂標汗：「我之前先許願希望新年可以健健康康，點知就病咗得番半條人命，今日（昨日）特登戴咗個好勁嘅口罩費事傳染人。（傳染畀男朋友？）唔知道呀，佢有拎藥畀我。（冇得錫錫？）病咗做咩都冇心機啦！」

想發新年財

她又透露新年將繼續工作，年初三會出席馬場活動趁機發新年財：「我去睇過相士，佢話我今年有粒財星，所以我到時會寓工作於贏錢。（好有信心？）要信呀，贏咗就發個新年財，真係唔好彩輸咗都係當做善事啫！」

Keep fit行性感

同場的鄭融穿上Duras連身褲及Pink Martini毛毛褸，型格兼備，她自嘲是「零橫財命」：「我淨係初初入行嗰陣，同成班圈內人新年玩魚蝦蟹、大細贏咗七千幾蚊。（新年同屋企人賭下錢？）唔會，同屋企人多數係食，不過我依家要Keep Fit，因為年尾有演唱會。」問鄭融屆時是否以性感歌衫上陣？她直言：「Keep到都OK喎，我想好似雪兒（美國著名歌手Cher）咁，成六十歲仲可以着魚網絲襪加貼身衫，佢啟發我要更加自律！」

文：盧坤穎