Kelly隱居安胎唔襟嚇
陳慧琳（Kelly）昨日足不出戶在家安孖胎，吸引傳媒守候追訪，Kelly怕了狗仔隊不敢出街：「我依家唔嚇得！」母愛至大的她甘願犧牲自己的衣帽間作孖B房，並趁機執了逾百件衫義賣，胎教孖B做善事。
Kelly前日宣布人工受孕成功懷孖胎，昨日有數間傳媒在她家門外守候，大肚婆未有外出，專心在家安胎。而老公Alex約四時半收工駕Benz返家，見記者即用手遮臉拒拍照，而車後座有愛兒「蝦餃仔」的BB專用座椅。
義賣服飾愛心胎教
在家安胎的Kelly接受電話訪問時表示昨日沒有工作：「門口好多狗仔車，嚇親我唔敢出街，最驚狗仔隊衝埋嚟嚇一嚇，影出嚟啲相唔靚，而且我依家大肚唔嚇得。麻煩同大家講聲，我會企定定畀大家影相，唔好衝埋嚟，我知大家都關心我。」
有消息指孖B是龍鳳胎，Kelly說：「未知呀，幾日前照過超聲波，醫生話仲未睇到性別。」問有否裝修BB房？她說：「唔使裝修，將自己嘅衣帽間讓畀BB，間房好大。（蝦餃仔同孖B一間房？）唔會，蝦餃仔已經識得嗌，怕佢哋互相嘈醒，哈哈。」由於Kelly犧牲了衣帽間，故整理了大批衫褲鞋袋，準備作慈善義賣收益撥捐「陳慧琳兒童助學基金」，為孖B作愛心胎教。
北京拍戲兩日搞掂
此外，去年尾Kelly懷孕初期飛北京拍《大鬧天宮》扮觀音，據知劇組對她照顧有加，造型由頭包到落腳，兩日完成戲份，不用她飛來飛去。曾跟Kelly合作《無間道》的導演劉偉強說：「我有四個仔女，希望佢追到我。（對親家？）等佢哋自由發展。」
文：音樂組