栢芝髮型化妝遮面傷
張栢芝日前拍《楊門女將之軍令如山》被武師以假刀劈中，導致右邊面頰紅腫，昨晚穿上全球只有一條的連身裙出席時裝騷時，表示要靠化妝遮面，她說：「依家化妝遮面都OK，唔係好見到腫，同埋將頭髮梳埋一邊，不過落咗妝之後都好腫。（成日受傷？）唔係好嚴重，意外時常都會有。（霆鋒有冇叫你小心？）有，佢都好心痛。」栢芝表示若再拍「近面」的武打場面，會同導演商討，因面部太重要。
一向想生女的栢芝，被問到知否陳慧琳人工受孕懷雙胞胎一事？她說：「恭喜佢，好戥佢開心。（倣效佢？）生BB係好開心嘅事，外人唔好畀咁多意見。（幾時到你？）我會自己盡量抽時間。」
同場還有與栢芝合作拍《極速天使》（暫名）的湯唯，她表示當知栢芝受傷已即時致電慰問，她說：「做演員係咁，好辛苦，不過拍攝過程好開心，栢芝好好人，演藝上好多嘢值得學習。」湯唯又指將到韓國宣傳與玄彬合演的《晚秋》，十分睇重這套戲。
