楊思琦走勻日本揸奶嗌過癮
楊思琦早前到日本東北部拍攝旅遊特輯，二十多天的行程中，她浸溫泉、熱沙浴、揸牛奶兼赤腳踩葡萄，此行名為工作，實則充電，過癮程度令她樂而忘返。
思琦妹到日本東北部拍攝旅遊特輯，是入行十年的一個難忘回憶。她說：「此行一去三個禮拜，絕對係樂而忘返，走勻成個日本東北咁滯，而且仲可以探訪當地農民，又可以親身摘葡萄、揸牛奶，真係過足癮，自己去好難咁樣安排。我哋仲將喺樹上摘落嚟嘅葡萄，赤腳踩爛整成葡萄汁，仲自己試番味添！味道酸酸哋，我諗再發酵耐啲會好味啲。」
喪食要減肥
思琦妹又難忘在古色古香的靚景包圍下，享受露天溫泉滋味。她說：「今次仲去咗一個充滿古色古香嘅地方——大內宿，嗰度有好多木造建築，當地人態度又親切，有位老婆婆直頭當我好似隔籬屋個小妹妹咁，整咗好多燒魚、蕎麥麵同燒米餅招呼我哋。我都有親手整蕎麥麵，雖然幼麵整到變闊條麵，但我覺得都幾好味吖！我哋又去咗浸溫泉、掟雪球同埋食牛肉刺身，入口即溶好似棉花咁，今次食肥咗三、四磅，返香港要即刻節食。」
文：影視組