連詩雅抗拒靚仔 唔吼周柏豪
周柏豪師妹連詩雅（Shiga）因耳水不平衡，經常暈車浪、船浪，所以她定下新一年目標，希望考車牌醫治暈浪，揚言要努力儲錢，希望買到心目中的Dream Car。另外自稱不喜歡靚仔的她，坦言對同公司的周柏豪沒有興趣。
Shiga自細已有暈車浪的困擾，她說：「船浪又暈，連飛機浪都會。」日前她跟柏豪一起工作，由元朗出巿區途中，她承受不了彎曲的山路，在車上嘔吐，她笑說：「當時柏豪坐我隔籬，我見唔對路，即刻問司機攞膠袋係咁嘔，嚇死佢。」
考車牌醫暈浪
而過去Shiga甚少去遊船河，她說：「因為人人喺船上玩到好高興，我就係咁瞓，好冇癮，所以近年都好少去。」Shiga聽聞駕駛的人不會暈車浪，所以今年她決定考車牌，而她心目中的Dream Car是Audi，她笑說：「不過有排都未買到，（叫媽咪資助你？）唔會，除咗同媽咪住，喺經濟上我獨立咗好多年，未試過伸大手板問媽咪攞錢，我會自己努力搵錢儲蓄。」除了考車，Shiga更希望今年可以作不同嘗試發展，她希望有機會拍廣告、電影或接主持工作。
望唱悽慘情歌
正籌備新碟的Shiga，計劃統一新碟曲風，雖然有人覺得輕快、富少女味歌曲比較適合她，但她希望一嘗演繹悽慘情歌，她笑說：「沉迷過去傷心事，會易啲引發情緒演繹。」單身的她笑言雖有指娛樂圈誘惑多，但她笑說：「都冇嘅，可能我唔係好吸引到異性，（你公司咪有方大同、柏豪及周子揚囉？）大家感情好到似一家人，唔會係嗰種感覺。」她表示近年跟柏豪最多接觸，但她不會對柏豪動情，她笑說：「我唔敢鍾意靚仔，好冇安全感，不過柏豪教我好多嘢，經常將佢經驗同我分享。」
採訪：音樂組
攝影：黎志輝
場地：wtc