Ron鼻涕結冰子珊飲奶取暖

日前徐子珊及吳卓羲捱冷到馬鞍山郊野公園拍攝新劇《法證先鋒Ⅲ》，當日氣溫只得個位數字，非常惡頂！飾演重案組警探的兩人率領探員沈震軒、陳志健及鄧永健在山頭蒐集證據，需要在崎嶇的山路上行走，而拍畢一組戲後他們即穿回厚厚大褸，但仍凍到「雪雪聲」，Ron更笑說：「凍到鼻涕都結冰！（成日返內地都未凍慣？）凍就係凍架啦！都驚病架！好在阿媽有煲湯滋潤吓。」Ron表示新春有三日假期，會留家做乖乖仔：「都會留喺屋企拜年。（豆利是？）吓！咁大個人啦！」

吹到面部爆坼

子珊亦被冷風吹到面部爆坼通紅，但她仍死撐身體好不怕病：「我狀態都OK，唔驚病，呢套劇都有唔少武打場面。（做打女？）的確多咗拍打戲！」對於兩年多前拍攝的劇集《仁心解碼》終於播出，子珊表示甚有信心，因劇中有不少真實案例均令人印象深刻，對於被指與現在的樣子不同，她笑說：「即係話我靚咗？成日都咁講o架啦！唔使理！」港男出身的陳志健則表示今次未有機會騷肌肉，但他直言並非「冬眠」，若有機會甚至不介意拍落水戲露肉！

其後一行人返回市區會合沈卓盈繼續開工，吸引不少市民圍觀，只見子珊落車後即急急啜奶取暖，但每當有寒風吹過，他們即凍到縮作一團，睇見都難受！

徐子珊吹到面部爆坼，啜奶取暖。	徐子珊飾重案組警花，街頭查案。	港男陳志健與沈卓盈拍劇，嘆未有機會騷肌肉。

文：立影　攝：司徒國榮