G.E.M.匿紙箱踩林宥嘉場
鄧紫棋（G.E.M.）日前到緋聞男友林宥嘉的「主場」台灣為新歌拍攝MV，不但要大玩軟骨功匿入紙箱，更要捱凍穿小背心赤腳上陣，震騰騰的她更險些跣腳跌落溫泉，幸而最後平衡身體才能脫險！
鄧紫棋（G.E.M.）早前飛到林宥嘉「地頭」拍MV，專程找來當地著名導演比爾賈操刀，G.E.M.今次拍攝行程相當緊密，要一日連踩廿多個鐘，連食飯時間都冇，更遑論約會林宥嘉。
G.E.M.今次要到著名溫泉區北投拍攝，郊外氣溫只有攝氏四度，G.E.M.卻要穿上小背心和赤腳上陣，她說：「當時Feel到啲牙不停震，震到自己都控制唔到，但一埋位又要扮穩定，對我嚟講真係考驗。」拍攝期間，G.E.M.更險些跌入溫泉，她說：「當時我要企喺溫泉舊石上面，本身塊石已經幾濕幾滑，我一踏上去加埋身體要擺來擺去，所以差少少跌親，雖然啲水好淺，但濕身就唔好啦。」
施展縮骨功
其後G.E.M.終可感受溫暖，轉場到室內進行拍攝，導演要求她施展縮骨功藏在紙皮箱，又倣效天后王菲揸大聲公唱歌的造型，她說：「幾好玩，呢個感覺想Rock啲，我就好似傻婆咁喺個大聲公不停嗌，出嚟效果幾正！今次嚟台灣拍MV，雖然真係凍到震，但我一向好欣賞呢位導演，所以再辛苦都值得，（有冇帶暖包？）梗係有啦，日日貼定廿個暖包，由頸貼到落腳，之後隻手又拎住幾個。」
文：專案組