君如親疏有別撐老公貶志偉
【羅美倫新加坡直擊】同時參演兩部賀歲片的吳君如，講到明支持由老公陳可辛監製的作品，另一部戲的導演曾志偉則未驚過：「佢只可以希望！因為我哋贏梗！」
吳君如前晚由成都為電影《神奇俠侶》宣傳返港，昨晨即到東涌出席《昂步棧道2011》活動，她表示計劃過年時帶女兒到澳洲體驗農場生活，之前則要忙於四出宣傳。
機艙搞首映
君如今年有兩套賀歲片《神奇俠侶》及《我愛HK開心萬歲》上映，但她不怕自己打自己：「唔怕，市場消化到，樓市好電影就好，經濟好啲人心情好，就有興趣睇戲。」問到是否想老公陳可辛監製的《神》片票房更好？君如即說：「希望囉！」其後急急補鑊：「咁《我》片都好好笑嘅。」
君如昨午會合曾志偉、陳法拉及高海寧等飛往新加坡宣傳《我》片，並在機艙上舉行36,000呎高空的預告片首映，全機乘客大感驚喜，更爭相索合照。君如又化身機師宣讀廣播，她以英文表示新加坡天氣炎熱，高達攝氏100度，更說：「熱到趴街！」
舉手認美女
初次入機長室的君如大讚空中首映夠新鮮，她說：「佢哋邀請美女，咁我舉手夠快！如果係高海寧就危險喇！（戲入面成日被人打？）係呀！得一個鏡頭係用替身。（有咗？）又講！唔係呀！」至於曾志偉表示心願是做齊海陸空的首映，對於君如偏幫《神》片，他淡定地說：「佢只可以係希望，因為我哋贏梗！《我》片係度身訂造畀香港人，我對本地票房好有信心，內地就可能佢哋贏。」