千嬅失大獎封嘴抗議
英皇和東亞力撐勁歌頒獎禮，怎知楊千嬅卻痛失「最受歡迎女歌星」獎，BIG FOUR更飲恨「亞太區最受歡迎香港男歌星」，據知賽果令東亞震怒，千嬅即打破慣例拒接受TVB官方刊物訪問。
據知，由於無綫與四大唱片反面，幸得東亞和英皇力撐《十大勁歌金曲頒獎典禮》，東亞更出錢搵日本組合EXILE來港助陣，連Amuis揸弗人黎明和「玉女掌門人」周慧敏都出山幫無綫造勢，怎知最後千嬅和BIG FOUR都輸掉大獎，何韻詩更捧蛋，只能力保衞蘭和JW的「金曲金獎」不失。
明白唔去冇獎攞
據消息透露，出心出力撐無綫的東亞對賽果震怒，除許志安缺席慶功冇面畀外，每年「最受歡迎男/女歌星」及「亞太區最受歡迎香港男/女歌星」都會在慶功後幫TVB官方刊物做訪問，但前晚千嬅卻破例拒受訪，擺明以行動抗議。昨日本報致電東亞董事陳志光了解，他說：「因為公司設宴幫EXILE餞別，千嬅趕住走才冇做TVB周刊訪問，可以後補再做；咁阿詩約咗杜琪峯食飯，BIG FOUR又唔齊人，唔去冇獎我哋明白。」
而首次獲亞太女歌星及合唱歌的千嬅笑說：「今晚好多第一次，喺TVB畢業收得工，自己集齊郵好滿足。」至於黎明出山幫衞蘭和JW爭獎成功，有謂黎明當年卻冇幫她，千嬅說：「我都有全版廣告，出外工作又坐頭等，佢喺後台都有恭喜我攞獎。」
犧牲泳兒鍾舒漫
至於英皇方面，消息指賽前英皇為Twins力爭組合獎和合唱歌，又為阿嬌爭「傑出表現獎」、鍾舒漫爭「唱作歌星」、泳兒爭「改編歌曲」，但結果因英皇攞太多獎，無綫分唔掂數，惟有犧牲她們，對此吳雨說：「公司對Twins有信心至叫阿嬌返嚟，但明白TVB要平衡，唔係畀晒你。」
坐足全晚的阿嬌，昨日出席活動表示對食白果冇唔開心：「去頒獎禮係為扮靚，今年繼續努力。」
此外，千嬅老公丁子高踢爆無綫前晚出錯字幕，將太太名字打錯做「楊千嬋」，千嬅見此笑斥無綫做事hea爆：「做乜咁hea？我唔做阿嬋呀！」
採訪：音樂組