阿倫指指點點 Mr.火都嚟

點着Alan冇咗聲

倫（咳）：你哋估我想問乜嘢呢？有趣啲啦，今日冇聲，我隻手一指要知道我心意，估我問乜嘢。（阿倫指住Dash，做了幾個手勢。）

Dash（猜謎）：由細到大見到乜嘢最開心？（阿倫笑着點頭）我喺屋邨長大，細個舅父送部舊walkman畀我，好開心，係我第一次接觸音樂，當時聽嘅錄音帶離唔開校長嘅歌，依家諗番當時係唱片業最興盛年代，好慶幸自己趕得切接觸當時音樂，真係幾難忘。

倫（雙手玩火車捐山窿轉轉轉，指住抱恙的Alan）：今日我同你都係冇咗聲。

Alan：我重低音，校長就超高音。

Alan自爆戒煙

倫：我想問你，平時有冇諗住學唱歌？

Alan：有吖，依家都學緊，發覺把聲愈嚟愈差，我已經應承自己今年開始戒掉我嘅壞習慣。

倫（追問）：乜嘢？

Alan（吞吐地）：戒……戒食煙，對健康應該好啲，但好不幸地，當我戒煙呢幾日，把聲係最差。

倫：唔奇架，我第一次戒煙肥咗廿六磅添，成日諗住有啲嘢擺喺口，唔食煙時成日食嘢。

Alan：知道自己把聲好緊要，所以好好保養，唔係好快會玩完。

倫：跟住到Ronny，你有啲外國人血統，北角同旺角，騎騎！其實你鍾意邊類音樂？

Ronny（搞笑）：我鍾意北角音樂，中樂……假嘅，哈哈！細個都有聽校長年代新派音樂，依家主要係pop music。

倫：平時作歌邊個攞靈感出嚟？

Dash：喺band房有時亂噏，衝吓撞吓，你搭升降機都作曲啦。

倫：係呀，去做「大製作（大便）」嗰時都有作曲，騎騎！好多時我喺夜晚臨瞓諗到好多melody，但瞓醒諗住寫番就唔記得晒。

Dash：冇壓力之下去諗最自然，我試過坐喺張枱對住電腦真係好難去做，好在依家電話好發達，幾時幾刻諗到曲詞錄低去。

倫：嚟緊歌曲有乜新方向？

Dash：我哋傾過想畫面再闊啲、遠啲，唔可以講偉大，因2010年同校長、Eason去過好多地方，不如將我哋見到嘅嘢擺番歌度，令大家感受到呢個世界係點。

構思《愛在深渠》

倫：樂隊最能表達年輕人心態，你哋呢方面有冇抱負？

Dash：沖涼時諗過寫首歌叫《愛在深渠》，坑渠個渠，落街見到好多污糟、垃圾，年輕人代表一團火，我覺得Mr.團火仲未燃燒得好紅，未變到最熱嘅藍色，相信到我哋將自己團火變藍色，會講到好多嘢畀大家聽，希望年輕人會鍾意。

Tom（指住自己的火燄頭look）：見到我個頭已經係火燄，之前同校長合作，喺內地經歷好多嘢：出騷、同當地主持人交流，畀我哋好多火，Mr.喺內地係好新嘅新人，所以返嚟香港應該畀自己好多火做多啲歌，喺香港認受性再好啲，去到台灣、大陸啲人可以注意番香港樂隊聲音。

倫（點頭）：幾好，講得唔錯，雖然年紀最細，但有紋有路。

MJ：之前出咗EP，希望六月前出到大碟，可以有好多唔同聲，自己作為結他手，除咗技巧重要之外，製造聲係樂手要做嘅事，自己最想擺啲新嘅聲入歌曲。

點着Band房多曱甴

倫：依家你哋有新studio，Ronny會唔會上去練多啲歌？

Ronny：搬新studio目的真係想上去夾多啲band，因為舊studio又污糟、又漏水，又有曱甴，好多時有藉口唔上去，喺屋企練吓算，搬新studio目的係想的起心肝，新環境幾好，望出去煤氣……有啲煤氣燈，都唔錯呀。

倫（笑）：差啲洩露新studio喺邊，哈哈！Alan又有乜新諗法？

Alan：新碟唔好得我一把聲，學校長話齋多啲voicing好緊要。

倫：Ronny啦，叫佢唱歌。

編曲增加人氣

Alan：所以盡量編多啲人聲，令件事豐富啲，歌迷喜歡聽到每一個人聲，唔需要理好聽、難聽，可以嘅話我都想參與結他，其實我本身都係結他手。

倫：佢哋彈兩支結他，你彈12線（木結他）。

Alan：我都想，不過電結他可以遮到我啲那渣嘅技巧，所以都諗緊。

倫：哈哈。

點着阿Tom受欺壓

倫：OK，又嚟啦。（手轉轉指住MJ）我同你都係鍾意食嘢，覺得乜嘢最good？

MJ：同校長去過好多地方，最深刻有次喺上海，食過好出名小籠包，係我一生三十年最好食嘅小籠包。

倫（陰陰笑）：嗰啲包皮好薄。（全場大笑）

MJ最愛小籠包

MJ（尷尬地）：校長話包皮好薄，都真係幾薄，我畀小籠包KO咗，每一啖都淥熟咗我條脷。

倫：又嚟，轉轉轉（指住Tom）你最細個，有冇覺得佢哋蝦你？

Tom：坦白講真係有架！（指住Ronny）正式上唔係蝦我，但好多小鬼馬發生，例如同Ronny去廁所，一格格尿兜，佢好鍾意趁我如廁時，一路講笑話令我窒吓窒吓，唔係好暢順囉。（失聲的校長笑到冇聲）大家有機會同佢一齊屙尿小心啲，佢唔會偷望你，但係咁講笑，幾恐怖。

倫（大笑）：放啲尿降。

Tom

Dash

採訪：肥B

攝影：劉智源

髮型：Perny Tang of Silkcut Salon

化妝：Alice Lau

場地：PACIFIC CLUB