周慧敏錄影甩裙唔怕蝕底
「玉女掌門人」周慧敏（Vivian）前日為音樂節目錄影，Vivian除了被一眾好友大爆瘀事外，更自揭曾於錄影時甩裙，幸有打底才不致出洋相。
見工跌嘢論盡
周慧敏前日為「周慧敏‧最愛V25」錄影，請來古巨基、陳偉霆、鄭丹瑞（阿旦）及阮兆祥任嘉賓。祥仔透露與Vivian早於讀書時已相識，更曾一起參加歌唱比賽，他笑言：「嗰時我有『學界陳百強』之稱，而Vivian就被喻為『柏原芳惠』（日本女星）。」阿旦大爆初次對Vivian的印象：「嗰時佢嚟見電台DJ份工，我覺得佢好論盡，咩都跌晒！」
Vivian在節目中亦自揭瘀事：「我試過錄《勁歌》時條裙跌咗落嚟，變咗半截裙，好彩我係打底王所以冇事！」而基仔亦不留情大數老友瘀事：「我哋好鍾意打桌球，我哋係用白波打其他顏色波，但我見過佢係相反咁打！」
為個唱學聲樂
已有十多年沒有到TVB錄影的Vivian，透露心情緊張，問到她可有特別為節目練歌？她笑言時間十分倉卒：「導演希望我可以自彈自唱，但我太耐冇彈琴，所以要即刻練番。」Vivian又透露正在為即將舉行的個唱練歌，她表示：「平時唱K嗰啲唔得架，我依家跟聲樂老師練緊。」她透露還未決定請哪位嘉賓，密友基仔即表示「隨時候命」！
文：影視組