崔建邦失「儀」祖藍祥仔搶攝位
崔建邦（Amigo）當法律冇到，他因醉駕被判停牌期間涉嫌揸車，據知警方正考慮立案調查，而Amigo則連日「冇影」，連舊愛唐詩詠昨日亦稱冇見過對方，而無綫高層陳家揚昨決定「飛起」崔建邦在周六舉行的《勁歌總選》司儀工作，頂替人選據知正考慮王祖藍、阮兆祥或金剛。
崔建邦醉駕停牌期間涉嫌揸車闖下彌天大禍，要收拾這個爛攤子，無綫亦覺相當頭痕，連藝員部高層樂易玲都冇時間理他。昨日記者向樂易玲了解無綫將如何處置Amigo時，她說：「我好忙，正閉關處理公司埋數，年尾同事嘅雙糧……唔得閒理佢嘅事！我亦都冇見過佢！」
唐詩詠冇聯絡
至於舊愛唐詩詠昨日出席活動時亦被追問此事，她說：「所有關於佢嘅嘢都唔回應，首先件事我都唔清楚，我回應會對件事唔公平，亦唔想每次佢嘅嘢你哋（指記者）都嚟問我，而最近我哋亦冇見面，亦冇sms佢，唔想搞住佢。」
Amigo似不在港
Amigo遭「離棄」，連帶工作亦全面冚旗。有關周六（十五日）無綫舉行的《十大勁歌總選》，司儀一職原本由曾志偉和崔建邦擔任，但Amigo出事後，負責《勁歌》之高層陳家揚亦決定「飛」他出局。陳家揚昨日向本報稱，現正開會研究頂替Amigo人選，日內將有定案。據知，目前無綫正考慮王祖藍、阮兆祥或金剛，三人中揀一人補上Amigo的司儀工作，與曾志偉主持《勁歌》總選大局。可說是Amigo師傅的曾志偉，連日來未見為Amigo「補飛」，據知他人不在港，今次《勁歌》拍檔換人，志偉是知情，但人選方面他則沒有參與意見。
文：影視組