GiGi 2月開騷伊健死跟
梁詠琪（GiGi）近來事業愛情兩得意，昨日被爆於二月底重踏紅館開演唱會，巧合舊愛鄭伊健亦於三月頭開騷，今次插旗搶閘成功的GiGi大方向伊健送祝福：「大家都一齊good騷啦！」
GiGi的助手昨日於微博宣布，指GiGi事隔七年將於二月廿七至廿八日再踏紅館，舉行兩場演唱會，巧合地撞正舊愛伊健於三月頭開騷，雖然現時雙方各有所愛，但今次一對舊情人接棒演出，可謂「玩味」十足。
祝福舊愛
據知，該兩天的檔期原定是肥媽、陳潔靈及葉麗儀合作的演唱會，可惜三人檔期未能配合，最終GiGi成功插旗，更搶去伊健的頭啖湯，為分手之痛扳回一城。本報致電GiGi求證，她說：「唔好話搶頭啖湯，我自己都好驚喜攞到紅館個期，之前平安夜《北京G夜》演唱會反應好好，算係幫我打咗支強心針。（伊健接棒開騷。）我知佢開騷，希望大家都有好成績，大家都一齊good騷啦！」
GiGi坦言上次失聲影響演出，今次一定會乖乖養聲，寒冷天氣亦會減少外出。問到男友Matthew會否繼續捧場？GiGi冧爆笑說：「每個好朋友都會支持，希望大家都鍾意睇啦！」
稱霸微博
當年GiGi跟伊健宣布分手後，伊健隨後與蒙嘉慧撻着，而GiGi一直寄情事業，先後與兩位男士發展，後者正是被本報踢爆的美國領事館官員Matthew。Matthew早前於平安夜晚過五關斬六將飛到北京支持GiGi，令關係進一步浮面。
另外，GiGi近日獲網友選為「微博最受歡迎女歌手」，其次是何韻詩及蔡卓妍。而「微博最受歡迎男歌手」的頭三位分別是周柏豪、黃宗澤及方大同。
文：音樂組