阿B：靠仔女頂住過難關

倫：譚詠麟　友：陳友　B：鍾鎮濤

阿B簡單 陳友諗頭多

在阿倫眼中阿B是大細路，諗嘢簡單、經常闖禍，陳友則諗頭多多，但好多時有頭威冇尾陣。

倫（正經地）：今次我破天荒做主持訪問番自己人，喺我角度睇好多嘢係出面人睇唔到，喺我眼入面，阿B係溫拿大細路，倒瀉嘢、闖禍，諗嘢簡單少少、片面少少，你唔好怪我咁講，因為你警戒心唔係咁強，呢樣關唔關你細個環境？

B：可能性格問題，其實溫拿除咗阿健，哈哈（笑了兩聲），大家都係早熟啲，好識諗，一般年輕人唔係咁識諗，你哋好早識做生意、有打算，所以覺得我o靚仔。

倫：因為有經理人take care晒啲嘢，又有我過濾，陳友加idea，你就放輕咗心情，久而久之喺我哋眼中覺得你好多嘢唔理。

鍾鎮濤

陳友

感性．理性

B：我好少要同人拗嘢，你有意見，佢有意見，唔拗一樣咁去，我自己冇咁多嘢講，但依家大咗諗嘢豁達，同溫拿一齊就變番以前。

倫：你性格咁多年定咗冇變，啲人話溫拿我主意最多，但邊夠陳友多吖。

友（笑）：你客氣啫，其實我火麒麟，idea多有時執行唔到。

倫：不過有時爛尾，就要收拾殘局呢，哈哈。

B（有少少埋怨）：曾經有段時間我同陳友一齊搞電影，佢係先鋒，但佢衝衝吓就冇咗，咁我點算呢！

倫（醒目地拉開話題）：陳友喺我哋呢班人最早做生意。

友：離做生意好遠，做artist感性，做生意理性，道德觀同一般人唔一致，生存唔難，但成功唔易。過往我好似一個掣，生意掣同溫拿掣啪嚟啪去，有時仲鬆埋添，呢個係人生過程，人生唔應該有既定目標，行到終點過程全部開心咪贏囉。

倫：聽你咁講你真係好理性，的確好適合做生意。

友：你成日話人好多計劃，但成事由天，謀事在人，有時唔好諗咁多。

失婚又破產未想過死

經歷過婚姻失敗、破產打擊的阿B，原來阿倫都曾經擔心他會做傻事！

倫：溫拿團隊入面，阿B你嘅經歷最多姿多采，但心底有冇怨過呢？

B（思索）：唔……怨呀？真係唔係特別咁怨，有時覺得點解運冇咁好，但過咗去就算，最緊要搞掂啲嘢，唔好煩，我唔係咁鍾意驚喜，平平穩穩開開心心就算。

倫（謹慎地）：曾幾何時有冇去到最壞打算？當你最諗唔通，覺得前路冇路可行？

B：真係冇得打算，總之冇諗過自殺啦，冇諗過咁慘，可能好多人似我十分一已經諗唔開，可能仔女畀到我責任，仔女點算呢？一定要頂落去，頂頂吓個結解到，慢慢一關一關過，又有朋友支持，又識咗范姜，啲嘢順起上嚟，由唔夠job到依家有得揀。

行善．得益

倫：有沒有發覺當你有信仰，參與好多義工，當你畀多啲，就會收得多啲？

B（恍然）：係喎，點解呢？有時呢個月有幾多開支，做一啲公益，或者去放生，又攞得番，可能上天睇住，真係天有眼。

（突然陳友電話響，被阿倫取笑他是生意人，陳友即刻話唔好意思，熄電話。）

倫：陳友有冇宗教信仰？

友：有人信主全家得救（全場大笑），我太太係好虔誠基督徒，但我唔會佔便宜，我都學咗唔少道理，喺佢箴言入面，發覺原來我哋好幸運，自己未讀完書加入溫拿，喺掌聲中成長。第二個好彩係阿B鼓勵我入電影界，拍咗啲有代表性電影，但天唔會畀全部好日子，要教訓吓你，當我入內地做電視，冇享受咁多掌聲，好似除咗對鞋喺地下行，唔會有人阿諛奉承，但攞咗好多經歷，又係一種恩典，久唔久一個呼喚，有溫拿呼喚返嚟開騷。

倫：你咁講你同耶穌傾到偈。

友（大笑）：哈哈哈！你要我講真話嘛。

多仔公 令人羨

倫：阿B係一個family man，日日都要見細路仔，愈黐身愈好，工作上點平衡？

B：工作上要犧牲，前幾年冇拍戲，今年開始拍番戲，新科技又好，日日傾住，只係摸唔到肉。

倫：鍾懿遺傳你幾多基因？

B：佢唔會走音，我都要慢慢唱至穩，上台我驚過佢，我唔錯得，佢他他條，又鍾意人注意，仲誇過我，我冇特別要威，有呢個女好開心，可以同自己夾band。

倫（扮妒忌）：阿B喺成隊人入面係多仔公，好大心血，養已經難，教仲難。

B：哈哈！其中兩個唔覺意，依家教好頭痛，個仔（鍾嘉浚）就嚟21歲有自己諗法，個女（鍾嘉晴）15歲就要睇緊啲。

鬥鍊車 幾送命

話當年，阿倫踢爆陳友曾撞車，溫拿幾乎「冇咗三件」！

倫：溫拿第一個買車係陳友，但係佢疏忽到差啲撞山。

友（自首）：唔係疏忽，係好勝，嗰時買跑車鍊，有架BMW喺石澳爬我頭，我咪追，點知飛落山崖，好在有棵樹頂住，我撞埋軚盤整花個嘴，坐後面嘅阿強、健仔升上車頂，落車之後媽聲四起，望一望下面原來係山崖。

B：冇棵樹就冇溫拿。

倫：冇咗三件。

B：講番嗰時環境好浪漫，成個社會，幾個收工遊車河，去石澳吹風傾偈。

倫（乘機攝位宣傳農曆新年溫拿演唱會）：嚟緊演唱會將呢啲情懷帶番嚟。（果然是老油條）

採訪：肥B

攝影：吳文聰

髮型：Perny Tang of Silkcut Salon

化妝：Alice Lau

場地：PACIFIC CLUB