松岡李那拒長短腳唔吼啤梨
進軍香港模界的33C日模松岡李那（Linah），最近被指和新城DJ葉文輝（啤梨）在平安夜拍拖約會，Linah立刻否認戀情，但覺得對方對自己有意思，不過她表明喜歡比自己高的男性。
日前有報道指Linah與啤梨撻着，Linah對於「戀情」曝光驚訝不已，昨日她喊冤說：「大家只係好朋友，咁耐以來冇kiss冇拖手！我性格大癲大肺，有好多男性朋友，會搭吓膊頭好似兄弟咁，所以有時我都會捉住啤梨手臂快啲過馬路，唔通咁都算拖手？當日食飯後去佢朋友屋企開派對，根本唔係拍拖！」
車內交換禮物
報道指啤梨送相機作聖誕禮物，她驚訝說：「我唔明點解記者會知，當日喺車入面交換禮物，我都有送相機畀佢。」是否認為有人放料叫記者來影相？她有點遲疑說：「我唔知，我諗佢唔會咁做，我信佢，但我一定會問佢。」Linah展示和啤梨的合照，相中兩人保持距離，笑問為何不親熱合照，她即說：「佢唔係我男友，點解要close？」
據知啤梨對Linah的確有意思，知道她愛狗，即投其所好送狗，更有人目擊啤梨上Linah香閨至通宵達旦。Linah說：「我估佢係對我有好感，送過朱古力同狗畀我，有時會過嚟我屋企探狗，我好喜歡傾偈，好多男女朋友喺我屋企傾到三更半夜都唔出奇，佢都一樣，但肯定冇發生任何嘢。（如果追你會接受？）現階段我冇諗過，因為大家真係好朋友。（嫌佢矮過你？）哈哈！我鍾意高過我嘅男仔。」
否認性感女星
對於啤梨前女友兼無綫藝員梁麗瑩，也在微博上踢爆指舊愛跟「性感女星」墮愛河數月，更自嘲身材平平，Linah即說不認識對方，更言自己不是性感女星！
採訪：名人組