汪東城篤吓篤吓搗亂魚蛋檔
飛輪海成員汪東城（大東）十分疼錫師妹糖兄妹成員Kandy。日前大東來港出席完活動後，秘密相約Kandy逛街和篤魚蛋，引來大批歌迷聞風而至，最後唱片公司要出動六位保安人員護航，認真大陣仗！
大東日前來港出席假尖沙咀舉行的時裝活動後，秘密相約Kandy在附近商場shopping，不過由於Kandy要購買靚衫出席頒獎禮，所以逛的都是女裝，但大東不但全無怨言，更充當形象顧問為師妹揀選戰衣，認真細心。
五分鐘食一盒
兩人在時裝店內有說有笑，大東拿起多件女裝外套為Kandy襯衫，又將自己的私家毛毛耳罩套在Kandy耳上，一臉冧爆的Kandy露出燦爛笑容，最後更扑錘購下一件啡色背心外套才離開。
為答謝大東，Kandy特別帶師兄品嘗他最愛的咖喱魚蛋，當抵達食店不久，近二十名歌迷聞風而至，唱片公司為免引起混亂，馬上安排六名保安到場維持秩序，讓大東和Kandy可以輕輕鬆鬆篤魚蛋，吃得津津有味的大東不斷以半鹹淡廣東話跟Kandy表示：「好好食呀！」兩人僅用了五分鐘便極速掃光一大盒魚蛋。
唔擔心傳緋聞
餵飽五臟後，大東和Kandy一臉滿足登車離開，大批歌迷亦飛奔上車追隨偶像，場面險象環生。事後記者致電Kandy，她透過唱片公司表示師兄大東Nice又健談，她說：「我同大東識咗一段時間，佢仲成日問我香港有咩好食，咁啱佢嚟就帶佢食咖喱魚蛋。」問到會否擔心傳緋聞？Kandy笑言：「唔怕啩，我當佢係兄弟，希望啲歌迷唔好誤會啦！」
此外，大東在剛過去周日到上海出席簽售寫真活動時透露，農曆新年想帶母親重遊荷蘭。
文：音樂組