中國小姐水着交峰零酬捱冷

昨日眾佳麗以性感泳裝在趙家大宅會晤傳媒，以及參加趙世曾之「趙苑」平頂儀式，儀式前趙世曾與19位穿上三點式泳衣的佳麗在趙家大宅共進午餐，可謂艷福無邊。趙世曾兒子趙式浩及中國小姐大賽總組委會執行主席伍小平也有到場。問趙世曾今次活動是否他的構思時，他直認想搞噱頭：「個儀式計劃咗好耐，我希望有噱頭，之前考慮過搵明星或者知名財經界人士，後來中國小姐第一屆舉辦，佢哋想搵我支持，做接待單位。」

自己着冷衫

趙世曾負責佳麗食宿、接送及借出大宅作拍攝MV之用，至於昨日邀請佳麗們出席平頂儀式則屬免費，問他有否派利是給佳麗？他說：「冇畀利是，大會規定，將來選出嘅佳麗就有，（有冇送番小禮物答謝佢哋？）我哋有招呼佢哋，聽晚（即今晚）又贊助佢哋出席晚宴，唔會個別獎勵，（要佳麗捱凍着泳衣咁慘？）唔凍，（你自己又着冷衫？）唔凍呀！（佢哋之前知唔知要免費幫你做平頂儀式？）佢哋知，大家簽咗合約。」又補充說若有合適佳麗，將來不排除邀請為旗下的生意拍攝廣告或擔任代言人。

女友紛避開

趙世曾坦言享受與穿上比堅尼的佳麗食飯，他笑笑口說：「好Enjoy。（食物特別好味？）係，我一生人最重要係Enjoy，要自己開心。（仔仔式浩會唔會嚟觀摩？）我向來鼓勵佢識多啲女仔，同我一樣有個愉快多姿多采嘅人生。（細仔式正？）佢有少少怕醜，所以唔會嚟。」問到女友不會為此而呷醋？他揚言昨日全部女友也要避開，並發表花花公子宣言：「佢哋冇得嬲，做得我女友就要大方，唔大方冇得做我女友。」

趙世曾邀得佳麗為「趙苑」舉行平頂儀式。

威過007 與一眾穿上泳裝的佳麗共進午餐，趙世曾大呼好Enjoy。

四佳麗出局

身為大會評委的他睇好哪位佳麗，趙世曾稱昨日只是第一次與佳麗見面，還未有機會正式品評，問到評審要求，他說：「得獎者將來會參加國際賽事，所以身材一定要高以及均勻，而且要智慧學問並重。」今次入圍佳麗原本共24名，但有4名因簽證問題而不能參加之後的比賽，而香港區賽的冠軍趙哲妤因身在外地，故缺席昨日活動。另外，伍小平透露所有佳麗於比賽期間均不能收取金錢或禮品，即使冠軍也不會標榜獲得獎金。

文：名人組