陳法拉轉戰樂壇最緊要有心
○五年來港發展的陳法拉，年年聖誕都在工作中度過，她雖掛念與父母在美國老家溫馨度佳節，但笑言佳節無工開才得人驚，更望明年進軍樂壇，還望做多棲藝人。
法拉挾○五年「國際華裔小姐」亞軍名銜加入無綫，近年連番在台慶攞「最佳女配角」獎之餘，已企穩一線花旦位置，雖然五年來的聖誕都在工作中度過，但她從冇怨言：「冇嘢做就驚啦！我喺美國大，聖誕氣氛同香港好唔同，外國嘅聖誕就好似香港農曆新年咁，會認真咁布置屋企，好懷念以前會同爹哋、媽咪坐喺火爐旁飲咖啡，又會焗雞食，感覺好溫馨。」雖然獨自來港發展，幸好法拉忙到根本沒時間寂寞，而且有男友在身旁給與無限支持，同樣窩心。
拍埋電影多棲發展
談到新一年大計，已簽約唱片公司的法拉將正式進軍樂壇，她承認由無綫藝員跳到樂壇，必須轉形象，問她是否要做實力派歌手？法拉說：「做咩都要有實力，否則條路好難行，我會做足100%功課，冇心就唔會出嚟唱歌！」其實除了出唱片，法拉在電影方面也在起步中，她坦言想多棲發展，但不會太急：「拍電影都要等機會，角色啱至演，（電視藝員難吸引觀眾買飛入場？）所以要更加努力，只要做得好，觀眾就會投入。」
文：影視組 攝：唐豁莊