春風滿臉 任影唔嬲 嘉玲粉紅型人掃貨
早前梁朝偉請假陪劉嘉玲過生日，溫韾過後的嘉玲明顯心情靚爆，日前化身迷人Pink Lady掃貨，認真風騷！
嘉玲、偉仔婚後至今一直努力造人，惜遲遲未見喜色，難怪嘉玲心急如焚，多次開口恨做媽咪。雖然偉仔最近忙於往返內地拍新片《一代宗師》，難以抽空造人，不過早前嘉玲45歲生日，偉仔急急請假陪老婆及「復工」造人，難怪嘉玲滿臉春風，日前更一臉風騷現身中環血拼逛街。
一味甜笑
當日下午，春風得意的嘉玲化身Pink Lady，一身粉紅色外套與運動褲，再配以藍色格仔恤衫，打出一個白滑心口到中環一帶名店Shopping，未幾，店員還為她拿着一袋二袋的戰利品從商店步出送她上車，問到是否買聖誕禮物予偉仔時，嘉玲更甜笑不語。事隔一日，嘉玲相約了數名友人到中環晚膳，直至深夜離開步出門口見有記者在場時，更任影唔嬲！被問及造人計劃時，雖然她貫徹笑而不答的作風，不過見她四萬咁口與記者揮手道別，一切可謂盡在不言中。另外，昨日內地演員周立波與富貴女友舉行婚禮，嘉玲以白色毛毛裙出席，同場還有伊能靜、黃曉明和任賢齊等人。
文、攝：追蹤組