Rosemary闖禍醒覺把握人生
混血名模Rosemary自從九月在美國涉藏毒及撞車後不顧而去案件後，一直採取逃避態度，亦推掉所有工作，現終於打破沉默，不但明日在香港會傳媒，昨日接受本報訪問時，指這段期間已有所醒覺，要學懂把握人生。
Rosemary將於明日為好友黎曉靈（Kimmy）代理的法國首飾品牌 Violette par Larme Violette擔任模特兒，今次是自涉案後首次在港出席公開活動，她除行騷外，還有份策劃整個騷。Rosemary昨晚為首飾騷綵排，現場見她精神飽滿，狀態不俗，還不時指點其他模特兒。Rosemary透露與Kimmy是教友兼好友，而對方在平安夜生日，她說：「想送有意義禮物畀佢，所以就幫手策劃呢個騷，覺得很有意義，幫朋友又可當送生日禮物畀佢。」
忙於學習
Rosemary之前一直處於休息狀態，但她並不清閒，她說：「依家生活好忙，要學好多嘢，例如普通話，二月要考試，依家同媽咪都以普通話溝通，其實媽咪喺我細細個時已逼我學國語，但當時細個唔知重要性，依家我仲做咗Jocelyn嘅國語老師同教Cara G.法文，依家識五國語言，其實好多人建議我開模特兒學校，但我自己有好多idea，要step by step。」
思想正面
Rosemary今年轉變特別大，問她從中有否得着？她認真地說：「我14歲入行，好多嘢對我好新鮮，亦見識很多，以為自己識好多嘢，家人同朋友畀忠告時我往往堅持己見，唔聽人講。但依家發覺以前唔識為將來打算，當突然有事發生先識醒覺，所以覺得要識得把握人生，要好好為將來打算，始終入行咁多年，當時咁細個，可能好多人同我講好聽說話，令自己唔知呢個世界真實一面，令自己冇進步，依家學好多嘢，要不斷進步，例如學說話技巧又或學睇合約，總之依家諗嘢好正面，熱衷學習新事物及多做善事。」
Rosemary又透露聖誕將會在港與家人度過，至於男友Jason會否一起過？她冇正面回答：「同屋企人過！」被問到幾時結婚？她甜笑說：「一步步，我哋有共識。」另外Kimmy開心表示Rosemary以友情支持她的活動，至於是否友情價，她指大家不講錢，繼而表示將投資過半億元，開拓中國巿場。
文：名人組