時間錦囊：連詩雅畫出珍貴回憶
甚有畫畫天分的新人連詩雅（Shiga），表示畫畫可陶冶性情及讓心靈安靜，她更儲起多本珍藏畫冊，並以「寶貝」形容它們，她笑言：「當佢哋係寶物咁放喺櫃入面，久唔久攞番出嚟睇會勾起好多回憶。」Shiga更稱畫冊比日記和阿姨親手織的頸巾更珍貴，只因當中記載不少「少女心事」。她又自爆作品中有不少裸體繪圖，問她會否尷尬？她說：「點會？大家都係專業，唔係用其他眼光望個模特兒，氣氛唔會尷尬，不過所有裸體畫都係女仔。（冇試過畫男裸體？）冇興趣。」
日本木像
呢兩個木像係之前去日本一個廟宇拍嘢時買嘅，好多人都會喺木像上畫畫，所以照廟宇個樣去畫，寓意神像守護我，依家我擺咗喺電視機頂，希望自己同家人都順利及身體健康。
手織頸巾
呢條頸巾好有意義，係移居加拿大嘅阿姨親手織畀我，因為佢有白內障失去視力，但知我怕凍都織畀我，所以我一到冬天都會諗起佢（指阿姨）。
cutie狗衫
呢件衫係我買畀狗狗Pinky第一件衫，依家佢已經好大隻，呢件衫已經唔再啱佢着，同埋件衫陪佢過咗唔少艱辛過程，因為買佢返嚟時又屙又嘔兼唔食嘢，搞到好瘦。
少女日記
我有寫日記習慣，記載每日發生過嘅事同心情，當中有唔少甜酸苦辣同心事，久唔久都會攞出嚟回味。（唔怕畀媽咪睇到？）我擺晒入箱，相信佢唔會偷睇。
珍藏畫冊
呢度只係其中幾本，每本都睇得到畫功嘅進步，每次翻睇都好有滿足感，呢啲唔係可以用錢買到嘅開心，畫畫過程成個人都好寧靜，好鍾意呢個感覺。
