深情對話：法拉：唔使咁快做視后

記：記者　法：法拉

記：攞咗兩次「最佳女配角」，係咪企穩實力派？

法：係企穩咗女配角！實力派係一條好長嘅路，演技係無止境，我仲有好多地方可以進步，好似睇《巾幗梟雄之義海豪情》，廣東話仲可以好啲。

記：今次同07年攞有乜唔同？

法：其實每次睇自己亦要睇對手，小紅姐（惠英紅）、定欣（胡定欣）都好好，但邊個好唔係演員可以控制。上次攞係初入行冇耐，識嘅人唔多，今次攞獎啲同事就爭住嚟攬，個個都好開心，識耐咗大家感情深厚咗，對「陳法拉」嘅了解亦加深咗，見到好朋友咁支持自己，所以感動到喊。

新劇擔正有壓力

記：《誘情轉駁》擔正有冇壓力？

法：有壓力，怕收視低係因為我，又怕自己未得住，以往唔諗收視，《義海》另有主角，唔關自己事，所以希望《誘情轉駁》收視穩定，唔好差過聖誕、新年同期嘅劇就得。

記：下個目標係視后？

法：唔需要咁快，呢啲好睇個角色，可以慢少少嘅。

記：選美出身，特別努力洗脫花瓶之名？

法：冇喎，我都希望自己靚，有演技都可以靚架，實力派唔一定唔靚，佘詩曼、張曼玉、蔡少芬呢啲好演員都係選美出身。

記：點樣由性感女神走向實力派？

法：演員好被動，「晴晴」（《義海豪情》中的角色）係添哥搵我，唔係我揀，可能之前我做過性感角色，觀眾代入咗法拉係咁嘅人。我都想被發掘做唔同類型嘅嘢，唔想被限制。

感情事業分得清

記：感情穩定有助專心事業？

法：我一向分得好清，以前讀書拍拖失戀都唔會傷心影響讀書，好清楚唔會畀私生活影響工作，每個人都要有社會責任，收五點通告，發生咩事我都要五點鐘返工，觀眾要睇嘅係我嘅戲，唔係我私生活。

記：家庭、事業邊樣重要啲？

法：就好似瞓覺同食飯，兩樣都重要，要識分配時間，唔好瞓住食飯。

記：公開戀情有冇影響事業？

法：唔係影響，係騷擾，我唔鍾意被騷擾，唔講就不斷被猜測，宣傳又講晒私人生活，工作咁辛苦提都唔提吓，我已經盡量唔講，但香港傳媒好得意。

記：仲未習慣？

法：仲未慣成日要喺床上食飯囉！

麥包：演戲都係搵飯食

記：記者 麥：麥包

記：之前一直你都話冇諗過要得到咩獎項，依家真係獲頒「最佳男配角」，感覺如何？

麥：原來真係好開心架！原本我哋成班都坐喺度玩緊，當頒完女配角後，我個心開始跳，播廣告時，自己即猛諗，如果中我要講乜？但諗極諗唔到，太緊張喇！然後坐喺附近嘅郭政鴻、陳山聰都不斷問我攞獎會講乜，我同佢哋講，一時之間諗唔到，嗰陣個腦真係一片空白，最後馬國明叫我cool down，唔好諗，跟住宣布時，我好似「飲醉酒」咁，完全空白，之後同啲傳媒做訪問仲覺得胃痛。

記：你入行廿幾年，今次獲獎，會唔會覺得可以鼓勵後輩繼續努力？

麥：其實得到一班同行、同事嘅認同，比得獎仲要開心得多，嗰一刻真係預計唔到，好想更多演員可以感受到呢樣嘢，自己咁多年真係冇白費，而且呢個獎唔單只令自己得到認同，亦鼓勵好多師弟，唔好話後輩，其實好多師兄好似李成昌、李國麟、陳國邦、黃智賢、郭政鴻咁，佢哋演戲都好認真。

為拍好劇推job

記：得獎後，有冇一啲實際嘅得着，例如搵真銀嘅機會？

麥：工作方面的確多咗，不過因為依家我都趕拍緊《紫禁驚雷》，所以計埋大陸嘅job，都推咗二、三十個，有時間我都想做，我做咁多都係搵食、求財啫！由頭到尾都想靠演戲搵飯食，想安定咗頭家先，不過都係嗰句，無TVB就無我。不過依家就連一啲團體，都邀請我出席佢哋嘅講座，希望我將自己嘅經歷，好似點樣同家人相處、多年嚟點樣捱過咁，同大家分享。

記：會否希望再有機會同監製李添勝合作？

麥：唔敢奢望，呢啲都要講緣分，我入行廿三年，同添哥合作唔超過五次，都係等公司安排啦！

記：之前《巾幗梟雄之義海豪情》攞唔到「最佳劇集」會唔會唔開心？

麥：真係可惜，因為劇組無論台前幕後所有人都盡心盡力，如果攞埋真係會完美得多！

人人有份爭

每年無綫台慶頒獎禮中「最佳男、女主角」獎競爭最為激烈，但其實不過是十隻手指數得晒的幾位小生、花旦之爭；反觀「最佳男、女配角」，能夠參與競爭的範圍更廣更闊，過去曾得「配角獎」的包括夏雨、湯盈盈（05年）；黃德斌、楊思琦（06年）；阮兆祥、陳法拉（07年）；黎耀祥、楊怡（08年）及謝天華、謝雪心（09年），各式各樣的演員都可染指這個獎項，其實「配角」之間的競爭更加激烈！

採訪：影視組

攝影：司徒國榮、沈健程

場地：Azure

服裝：Dior

髮型：Ling Chow@Private i