謝霆鋒拍戲出名唔錫身，想不到就連太太張栢芝亦受「傳染」，忙於投入新戲拍攝的她日前墮馬受傷，雖然粉臉無損但卻令身邊人擔心不已，至於霆鋒則飛往成都搵銀去！
栢芝「復出」後新作浪接浪，而她與任賢齊主演的新片《楊門女將之軍令如山》近日埋首於內蒙開工。據悉，戲中扮演穆桂英的她，日前拍攝一場勇救愛兒文廣的騎馬戲時，意外墮馬受傷，搞得台前幕後緊張不已。消息傳出後不少栢芝影迷顯得相當震驚，部分人更擔心得哭了出來，栢芝為安撫一眾支持者，負傷忍痛透過經理人Emily，上載OK手勢靚相證明安好，更寫道：「一定要記得（我）永遠是最能忍痛和有勇氣的女人哦！」
記者昨傍晚時分與Emily取得聯絡，她透露：「嗰日風沙好大，有成六至七級風勢，栢芝上馬背試咗兩次都冇事，點知真正拍攝時馬匹突然發難，佢就被摔落馬背墮地，由於盔甲戲服好重，栢芝好難企番起身，匹馬幾乎踏咗落去佢度，好彩個馬主醒目即刻拉住隻馬掉頭，而企喺栢芝身邊扮演丫環嘅臨時演員亦幫手托一托，搞到自己尾龍骨都受埋傷，栢芝就手腳、肩頸及膊頭等多處擦損！」
栢芝昨日則按照原定計劃，暫離劇組飛往蘇州出席剪綵活動，之後則飛返香港，預計今日會找醫生作詳細身體檢查，而老公霆鋒則由助手表哥陪同下現身成都公幹，甫飛抵當地即引起一陣騷動，兩公婆繼續高唱「分飛燕」！截稿前仍未與他取得聯絡。身為老爺的謝賢得悉新抱受傷，卻從容回應：「我見過佢，冇事喎。（叫佢錫身啲。）嘩，你估叫就聽咩？工作緊要，佢今次返嚟，都係因為掛住老公同兩個仔，想享吓天倫啫。」
文：影視組