逼爆Rika被40吋La Ying追擊
組合OctoBeez及Bro5是周秀娜師妹師弟，早前為明年舉行的小型個唱拍宣傳照，走勁舞路線的OctoBeez性感上陣，以三點式上身火併半裸的Bro5。他們聲稱已經「熟到爛」，當大哥的La Ying更不時提點谷胸的Rika小心走光。
最近組合OctoBeez及Bro5除了忙於出騷外，現在他們連晚上時間亦不放過，經常於凌晨時分練歌排舞，為明年的小型個唱做足準備。
半裸養眼
早前兩隊組合拍攝宣傳照，為求增加養眼度，女的包括成員Hidy、Hazel同Rika，都以色彩鮮艷的比堅尼top亮相，谷胸又騷玉背，其中以鬼妹仔Rika最為逼爆。男的亦不甘示弱，以半裸騷肌肉追擊，La Ying的40吋胸肌比女生更有「睇頭」!
拍攝期間，他們向鏡頭擺盡性感姿式，當Rika向La Ying「胸壓」時，男方不但沒有斜視，而且更嘲Rika小心走光，講笑對她說：「小心啲，唔好露晒啲膠紙出嚟，費事要攝影師執一大餐。」Rika亦毫不客氣回應說：「你就好啦唔使黐膠紙，不過你條『事業線』打上去嘅炒底陰影，小心整污糟我件泳衣呀。」
唔會過電
事後他們說由於大家太熟，不但不會同對方「過電」，還會互相督促提點，La Ying認真地說：「雖然我哋簽畀公司只有年幾時間，但我哋已經出道咗三年，多謝公司畀機會我哋先可有第一次個唱，我哋真係出盡力做到最好，其他嘢都係次要。」
文：專案組 攝：吳文聰