袁嘉敏恨上銀幕放笑彈
○九年港姐「最上鏡小姐」袁嘉敏（Candy）卸任後專注司儀工作，她坦言最想拍劇演戲，並視好姊妹吳君如為偶像，希望能像她一樣能演能講樣樣皆精！
參選時被封「翻版郭可盈」的袁嘉敏，今年七月卸任港姐後即簽約成為無綫藝人，最近被委派做《東張西望》主持，她說：「呢幾個月做咗好多主持工作，好似生活台嘅《古怪屋》，仲有同蘇民峰師傅合作，最近又幫《東張》做專題故事，好似早前就去咗花園街訪問攤販老闆，依家比以前更關心時事問題。」
與「正版」碰頭
早前Candy更有機會與「正版」郭可盈碰面，她透露場面十分搞笑，她說：「記得嗰次係我訪問佢，佢同我講話知道我係佢嘅翻版，大家都覺得有啲似，不過佢一定靚過我，而且好有觀眾緣。」
目標全能藝人
主持工作雖然既有趣又富挑戰性，但Candy仍希望可能拍劇，並以好姊妹吳君如做目標，她解釋：「君如係我偶像，佢拍戲形象搞笑，做主持又咁掂，真係一個全能藝人。多謝佢支持我選港姐，可能因為大家性格好似，一樣咁堅強，所以我有乜心事都會同佢傾，而佢亦好保護我。」問到最想與那位男藝人合作？她二話不說要跟視帝黎耀祥合作，她說：「我訪問過黎耀祥好多次，佢同佢太太都好好人，大家咁啱傾，合作起上嚟都應該夾啲。」
文：專案組
服裝及場地：Esprit
化妝：Seci K