陳偉霆巨胸嚇窒詩雅
善心的陳偉霆（William）不惜獻身「拍賣胸肌」！首次接受人體倒模大晒fit到漏身形，豐胸有術的他卻拒與女友蔡卓妍（阿Sa）齊齊「煉鋼」，全因怕嚇親伊人。
William、詩雅及陳法拉昨日與模特兒Cara G.、周汶錡等現身慈善活動，William獻出第一次「出賣」胸肌為香港癌症基金會籌款：「做咗個由胸到肚臍嘅人體倒模，稍後會有拍賣，想線條靚啲仲忍住啖氣谷胸半個鐘。（唔做低啲？）今次係正面慈善活動，唔適合。」
操肌咆哮嚇親人
問及在旁的詩雅有否趁機「抽水」？她說：「直情唔敢行埋去，佢超級大，拍埋去死梗。（佢大過你？）好明顯啦，佢大好多，好彩我唔使倒模。（叫佢傳授豐胸秘方？）冇用，佢話細個飲好多奶。」William聞言哈哈大笑說：「其實我呃佢，我先天都好弱，都係後天培育做運動得番嚟，不過唔啱女仔啦，會愈練愈橫。（同阿Sa齊練胸肌？）我做gym嗰陣唔鍾意有其他人喺度，因為我會咆哮，怕嚇親人。」問他與阿Sa邊個大啲？他停了半秒才答：「要睇角度！」
陳法拉難於取捨
William又向內地fans派喜訊，說活動前收到好消息，因電影《前度》之前不能在內地上映，現公司安排在廣東省上映，北京暫時未知，稍後他會與詩雅去宣傳。
法拉則說正計劃聖誕期間去旅行，但此期間屬工作的黃金檔期，令她難以取捨：「想去美國見父母，知佢哋想買禮物畀我，成日問我鍾意咩顏色，叫佢哋唔好嘥錢，佢哋又唔肯認買嘢畀我。」
文：音樂組