發哥風雪徒步苦撐兩公里

杭州有報道指當地遇上五年來最大風雪，多班航機被迫延誤之餘，陸路交通亦接近癱瘓，更指周潤發夫婦也被困在其中！發哥在北京為《大鬧天宮》趕工後，即要為另一部電影《建黨偉業》埋尾，途經杭州轉赴拍攝現場橫店時，遇上世紀大塞車，原本兩小時半的車程，與發嫂陳薈蓮被迫困在車廂十六小時，連水都冇多滴，認真攞命！

劇組恐搞出人命

發嫂連日來為照顧發哥，因此積勞成疾患上大感冒，在杭州已需要打點滴，可是她仍堅持與發哥同行，卻萬料不到遇上超級大風雪。據知，發哥夫婦連同助手一行兩車人早於前日下午已從杭州出發，往橫店為拍攝作好準備，可惜外面風雪實在太大，引起大塞車，車龍長得不見尾。

縱使發嫂身子經已調適，但眼見距離目的地遙遙無期，加上僅餘食水不足以果腹，心急如焚的發哥不時與橫店劇組人員聯絡，商討逃亡對策。當一行人等到半夜，劇組緊張起來，為怕搞出人命，在確定發哥位置後，派人花上五小時把熱粥送給發哥發嫂吊命。

發嫂吃過粥水後精神了不少，直到昨日清晨六時，發哥見距離拍攝場地只有兩公里，決定與發嫂徒步行往目的地。據知，為了輕便行裝照顧同行的發嫂，向來視相機如命的發哥，連「第二生命」也不顧，留低相機給司機保管，只嚷着要帶備急救箱傍身，可是發嫂卻認為撐得住，最後連急救箱也置之不理，可見他倆夫妻情深。

為照顧發哥，發嫂積勞成疾患上大感冒，搞到要打點滴。	杭州漫天風雪，發哥夫婦困在車龍，呆等十六粒鐘。	發哥在大風雪下與發嫂徒步趕赴橫店，苦況可想而知。

發嫂：真係好淒涼

在冰天雪地下，發哥夫婦艱辛完成兩公里「長征」，最終安全到達會合劇組。本報致電發哥求證時，他說：「第一次見咁大風雪，真係好驚訝，其實老婆都係瞓吓醒吓，好在架車有暖氣！」問為甚麼連相機也不顧？發哥說：「咁多行李，唔通又帶埋走咩？咁大風雪，問老婆行唔行得，佢話OK咪行埋段路囉，好在最後段路都有廠車接我哋！」而發嫂則說：「其實佢（發哥）趕緊戲，拍3日就要走。今次真係好淒涼，又冇得去廁所，真係好多謝劇組送粥。佢仲話最緊要保命，話老婆最緊要，見我冇乜事，所以咪行路囉！」

文：專案組