林敏驄陳奐仁歪音擦火花

溫拿樂隊將於農曆新年舉行演唱會，向來諗頭多多的林敏驄就與陳奐仁一起為他們的新歌《樂壇風雲》作曲、填詞。阿驄坦言與陳奐仁鮮有合作，不過就非常合拍及有火花，全因兩人廣東話都講得不夠正，阿驄笑言：「其實首歌我哋用咗一個鐘頭就作完，嗰日上咗佢studio，我一句、佢一句咁，就搞掂咗，佢啲廣東話同我一樣唔係好正，jam起嚟就特別有效果﹐出咗demo之後，溫拿佢哋都話好正，要即刻錄音。」

黐大字報防甩嘴

阿驄今次作這首歌全是受張國忠所託，阿驄謂：「張國忠交代我要作得好好睇睇，佢都有畀意見，內容大致係反映現今樂壇情況。」

溫拿樂隊明年開演唱會，日前拍MV更拍出當年《溫拿狂想曲》的感覺。

林敏驄為溫拿樂隊新歌作曲、填詞，更客串於ＭＶ演出。

而日前溫拿樂隊五位成員就齊齊到紅磡一間茶餐廳拍攝這首歌的MV，但阿驄居然都有份做茶餐廳夥計客串演出，拎起水煲的他相當搞笑，他說：「譚校長order我一定要出現，（佢哋有冇成日NG?）冇，個個都好專業，喺現場個個都笑到瞓街！」說到歌詞難記，拍時他們有否甩嘴？阿驄笑言︰「我哋黐晒大字報嘛！啲字大到隔籬街都睇到呀！」

文：音樂組