楊思琦溫泉(目及)裸女面紅耳赤

楊思琦早前到日本東北地區拍攝旅遊特輯，逗留約三星期，竟有意外收穫，她說：「我去嘅時候係秋天，見到滿地紅葉，景色好靚。後來我哋上咗山頂溫泉區，估唔到嗰度會落雪，大家仲好開心玩掟雪球，喺工作中得到歡樂。」

最叻煎牛扒

向來保守的思琦，從未試過浸溫泉，她解釋：「一般浸溫泉都係唔着衫，我份人比較害羞，好彩拍攝時候可以着泳衣打底，但見到其他女仔唔着衫走嚟走去，都有啲唔好意思，搞到我面都紅晒。」

思琦為將來小朋友着想，立志學好廚藝。

思琦希望與李泳豪的感情「低調啲」。（資料圖片）

拍旅遊特輯外，思琦最近亦非常好口福，連續拍攝收費台的《新派煮意》、《和味蘇》和一個專介紹甜品的節目，問到她的廚藝有沒有進步？她笑說：「我識食唔識煮，最叻都係煎吓牛扒，因為媽咪太好服侍，由細到大都照顧周全，唔使我做。」

望多拍劇集

不過，思琦已立志學好廚藝，她解釋：「將來結婚後都要識，唔係實餓死小朋友，唔可以餐餐出街食飯嘛。」問到何時與李泳豪拉埋天窗？她說：「唔諗住，感情事都係低調啲，以工作為先。」新一年，思琦希望可以多拍劇集，她說：「今年多做綜藝節目同返內地拍劇，經常要走嚟走去，少咗見屋企人，希望嚟緊一年可以多留香港拍劇，試多啲唔同戲路。」