王喜12字真言反寸無綫
林峯獲無綫全力力捧，就連老闆方逸華也親撰十二字真言以示支持，王喜本擬跟林峯緋聞女友鍾嘉欣做螢幕情侶搵真銀，豈料乏人問津，無奈也用十二字真言讚無綫的捧人之道。
王喜、鍾嘉欣主演的《囧探查過界》收視不俗，昨跟同劇的黃浩然、李思捷、朱慧敏等到尖沙咀鬧市宣傳，捉路人扮「囧樣」，引來數十人圍觀，大收宣傳之效。
事後王喜謂很想拍續集，但監製卻不置可否，問到他與嘉欣的螢幕情侶檔在聖誕黃金檔期可有狂接工作？王喜笑言：「我宣布同佢拆夥，炒佢魷魚，呢兩星期都冇人搵我哋做嘢，冇人寫、冇人跟，我惟有單飛發展，（佢同林峯太根深柢固喇！）證明無綫捧人係善用資源、水銀瀉地、無孔不入，而且係多角度、多層次，捧起想捧嘅人！」王喜的形容，簡直可媲美方逸華贈予林峯的「無懼閒言，好評如潮，再創佳績」十二字真言。
拒評論崔建邦
談到崔建邦醉駕獲輕判，旋即被指獲安排翻身再做《勁歌金曲》主持，王喜聞言說：「係監製有需要搵佢，（佢係陳志雲『叛徒』？）冇話叛唔叛徒，都係無綫一分子，既然我同鍾嘉欣唔得，咁我同崔建邦試下得唔得啦！」至於有指崔建邦對朋友不好，又被舊女友「中巴」鄺敏慧唱人品，王喜謂跟他們不熟，不宜評論。
此外，鍾嘉欣在劇中演的開心女鬼被網民指浮誇，她解釋那是角色需要。至於在劇中勁冧林峯，她笑言：「劇本需要，咁林峯又好紅，做偶像都啱嘅。」
文：影視組