Theresa情傷爆謙仔冇句真

謙仔在新片《婚前試愛》跟「浸大Ｅ神」楊梓瑤有超激床戰，兩人因合作拍戲而傳出緋聞，不知是否令Theresa呷醋而爆出「冷戰」。昨日Theresa跟謙仔以緋聞情侶出席《飄雪樂韻聖誕精品》開幕禮，兩人企到離行離罅，全程零交流，大會安排兩人交換聖誕襪，她也明顯避謙仔眼神。之後傳媒再要求兩人合照，木無表情的她雖未有拒絕，但就刻意企開些，拒讓謙仔埋身，甚至有意無意用背脊得住對方，謙仔不禁面露尷尬神色。

謙仔坦言會送聖誕禮物及邀約她，得知Theresa不捨得花五千元裝修被破壞的玻璃窗而四圍格價，他即豪氣說：「唔使，我畀，（送玻璃？）咁送鑽石窗。」對謙仔表示要送她鑽石窗，她不屑說：「咁搞笑？我就唔信，佢講乜我都唔信，識佢咁耐冇同我講一句真話。」

Theresa更突然將謙仔由緋聞男友降至同事關係，謙仔表明聖誕約會她，她斬釘截鐵說：「我一定唔應約，（咪好傷佢？）我唔覺得好傷人，我比佢更傷。」問她是否又遇愛情騙徒？她充耳不聞，是否跟謙仔劃清界線？她說：「大家同事好難劃清，（叫公司唔再安排你兩個一齊工作？）我諗公司會有安排，（覺得謙仔個人點？花心？用情不專？）唔回應，（對佢失望？）唔回應。」記者指她完全不交戲，她直言：「我個人就係咁真。」

謙仔對激嬲Theresa，表示不知情，他否認追求對方，也否認給對方錯誤訊息，但他說：「係咪我衰口多多，好多人成日話我亂講嘢，嬉皮笑臉，既然你哋咁講，有啲問題發生咗，但我要了解先，如果真係激嬲佢，我會氹番佢，按熄佢啲怒火。」

Carol：唔關我事

而楊梓瑤（Carol）被問到可有與羅仲謙聯絡？她說：「冇呀！我哋拍戲咋，呢排考試，有時間都閉關溫書啦。」至於是否因床戲過分逼真而激嬲羅仲謙緋聞女友傅穎？Carol說：「應該唔關事，其實我當阿謙係前輩，佢好好人，成日教我做戲。」

採：音樂組