葉蒨文獲金針獎焗認老
久違的葉蒨文（Sally）昨日現身「十大中文金曲」記者會，宣布獲頒今屆「金針獎」，對於獲頒一向被形容為「老人獎」的金針獎，樣貌身形仍保養得宜的Sally竟認老：「我都上咗年紀囉。」
近年沉迷打高爾夫球和羽毛球的Sally已鮮有台上演出，昨日獲電台宣布獲今屆「金針獎」，穿上Alexander McQueen黑色裙的她，透出黑Bra邊兼事業線若隱若現，性感非常。而後輩梁漢文和王菀之（Ivana）則送上高爾夫球和羽毛球祝賀。
王菀之賣口乖
Ivana表示很喜歡Sally的歌曲，Sally抵死笑問：「你知道我係邊個咩？」Ivana即謂：「我識唱你好多歌，最鍾意係《黎明不要來》。」令Sally開心不已。
至於Sally表示在一星期前知道獲獎，感到開心和光榮。說到這被指是「老人獎」，可覺自己太年輕便攞獎？Sally笑說：「多謝你話我年輕喎，我覺得我都上咗年紀啦！好多人攞咗呢個獎，只係我冇呀！（你身材仲keep得好好，可能打低時下o靚模？）你哋咁講我汗都出晒嚟，我之前唔知咩係o靚模，個名咁得意。」問到攞獎當晚會否更性感？Sally則說：「唔會諗呢啲，會尊重晚會揀一啲合適嘅衫。」
心郁想開個唱
Sally稱現最頭痛是當晚的八至十分鐘演出，因已很久未有演出，感到很緊張。而問到可打算開演唱會？Sally坦言：「都有心動，因為好掛住啲歌迷。（啲酬勞唔夠吸引？）唔係，係想做得特別啲，或者等到五十歲先開。」
文：音樂組