陳豪降格同事自閉療傷
陳豪與廖碧兒（Bernice）的六年感情，期間雖然離離合合，但無礙兩人以「情侶檔」接Job搵銀；不過，自女方於日前被本報踢爆正與坐擁數億身家的富豪二代Alastair拍拖後，陳豪亦坦然接受現實並以最平淡的心情面對，昨日不用為《心戰》開工的他，「屈」在家療情傷，當記者致電問候時，他亦樂於在「分手」後首次開腔回應，還大愛地說：「只要見到佢（Bernice）平安，我就安心！」
繼續「情侶檔」搵銀
眼見Bernice有「富二代」新歡，「被飛」的陳豪稱自己沒有酸溜溜，並以「佛偈」回應：「算啦，緣分呢啲嘢，係你就係你，好多嘢都係整定！（知道Bernice跟Alastair拍拖？）唔知，佢冇同我講，（Feel唔到？）真係Feel唔到，（被踢爆後Bernice有冇打畀你交代清楚？）冇喎，唔使交代啦，都好清楚啦，登晒出嚟！（酸溜溜？）平淡心情面對啦，我信緣分，（祝福佢？）只要佢平安，我就安心！（有冇影響你哋『情侶檔』搵銀？）應該唔會嘅，公司會有適當安排，工作嘅嘢我採取Open態度，每個Job都係一個機會，（見面會唔會感到尷尬？）唔會，再見亦是朋友。」
無懼雙失向前看
被形容為「雙失」即失「視帝」和「失戀」的陳豪並未氣餒，他自強不息稱要重組自己，為外邊大片森林努力。他說：「雙失？咪重新嚟過，（外邊大片森林嗎？）唔知呀，總之重組自己，明年再出發，好好做嘢，（有目標再拍拖？）希望有完整人生，有婚姻有事業，但會事業行先，因為緣分係要命運安排，（介意與富二代比較？）唔介意，人本來就冇分高低。」陳豪昨日雖全日足不出戶，但其座駕卻於下午三時，由三名懷疑是其親友開出，直駛至天后方向，估計是往陳豪媽媽的寓所。
文：影視組