鄺敏慧讚新男友溫柔 似登天堂
鄺敏慧（中巴）昨日與舊愛崔建邦的緋聞新女混血模Marina V.一起擔任模特兒行騷，兩人之後又應記者要求合照。問到中巴與Marina同場可會尷尬，她即反問說：「吓，係咩？我真係唔知，大家冇聯絡，佢嘅嘢我都冇留意。我已經有新男朋友，我依家好開心，新男友對我實在太好喇，以前嘅嘢唔記得喇，陰影都冇晒。」
中巴透露男友比她年長十一歲，是生意人，她甜蜜地說：「我哋拍咗拖兩個月，佢對我好溫柔，唔會郁手郁腳，聽日係我正日生日，佢尋日送咗九十九支玫瑰同巴士蛋糕畀我。（今年生日同上年好大對比？）係呀！（男友有冇承諾唔打你？）佢話講嘅嘢可以係假，佢會用行動證明我睇，佢知我以前嘅事，明白過咗去。（同男友公開戀情？）拍拖梗係拖手出街o架啦，唔通收收埋埋咩。（依家同之前係天堂與地獄？）係呀，我依家上咗天堂。」她又表示希望不要再跟崔建邦的名字扯上關係。而同場行騷還有張舒雅、阿Yu趙梓淇等。
