各孖男友外遊過聖誕 法拉諸葛妯娌破冰
陳法拉、馬浚偉、蒙嘉慧、李思捷、梁政珏等昨在商場為新劇《誘情轉駁》造勢，現場大玩遊戲氣氛熱烈，剛攞完「最佳女配角」獎的法拉呻「阿哥」馬浚偉未送禮物，連祝賀短訊都欠奉，提到男友薛世恒可有送禮時，她卻要求要有心思的禮物，法拉將與男友到美國共度聖誕，問到送張婚書可夠心思？法拉馬上耍太極：「我啱啱收到楊千嬅喜餅，（會否效法千嬅借外遊註冊結婚？）今日唔講呢啲！」
與馬浚偉咀嘴
法拉與馬浚偉大玩「咀嘴」遊戲，馬仔被詐型無送禮，他稱即場已送上抱抱：「我同佢男友都熟唔怕呷醋，同『阿妹』咁熟就唔使送啦，現場都攬咁耐啦，大把男同事要輪住攬，我已畀人鬧！」 此外，一直盛傳與法拉不和的「妯娌」諸葛梓岐，昨日亦表示會與男友薛嘉麟於聖誕外遊滑雪，並透露有祝賀法拉攞獎，她說：「我恭喜咗佢，（同法拉搞好關係未？）同佢關係好好，只係比較忙少見面。」
文：影視組
