吳浩康男人最痛性在冇事
出戰拳賽被對手「KO」的吳浩康（Deep），慘被踢中「何B仔」感受男人最痛的滋味，右腳更爆缸要入院縫2針，經過一晚休息後，Deep慶幸屙尿唔痛，相信性能力冇受損，但陰囊至肛門的部位卻瘀黑了。
現為泰拳教練的Deep，前晚出戰與消防員對手爭冠軍。雖然有女友莊思敏和好友陳偉霆、鄭希怡、詩雅打氣，可惜經三回合激戰後落敗，還遭對手踢中「何B仔」兼上五吋下五吋爆缸。前晚十時許，Deep到私家醫院縫針，但因收費要四千元超高昂，節儉的他即轉去政府醫院求診，結果在急症室呆等四粒鐘才搞掂返家。
老竇鬧白癡
昨午Deep接受本報電話訪問，他坦言被對手四次踢中「何B仔」：「仲有啲痛，陰囊至肛門瘀咗，要敷冰同熱水。（唔捽藥酒？）我唔會攞嗰個位嚟捽，好核突。（功能受損？）冇測試，但屙到尿，唔痛。（驚唔驚影響性功能？）唔擔心，試完喺微博話畀大家知，哈哈！」
Deep謂幸好有戴護陰罩，否則後果不堪設想：「佢好大力，踢到護陰壓落下陰，畀佢踢完第一吓已經痛到想棄權。女友同老竇都鬧我，老竇仲話：『白癡！多餘！』」Deep又指由於爸爸和女友強烈反對，以後不會再比賽。
女友覺心痛
莊思敏昨日出席婚紗騷，她稱在現場睇男友比賽好心痛：「有啲嬲，唔應該攻擊重要部位。」妹妹莊思明出席慈善步行則說：「會慰問姐夫。」而她在東華騷演唱獲「超級巨聲」周志文贊助一千元，但否認對方有意追她。另外，鍾舒漫和泳兒亦慰問Deep，泳兒謂與Deep同一師傅學泰拳，自己亦試過被踢中大髀罅勁痛。問驚唔驚被踢胸？她說：「驚呀，唔想佢腫脹。」
文：音樂組