阿詩送抱谷碟特製護胸褸
何韻詩昨日為新碟舉行簽唱會，阿詩笑言粉絲買三張唱片有合照，五張則送抱，主持Donald就建議買夠六張可以兩者兼得，十分搞笑。阿詩又稱歡迎男女老幼向她抱抱，為此她特別穿上一套胸前及腰間鑲有銅片設計的西裝褸，並笑說：「因為要護胸，上下都要照顧。」
阿詩早前也曾在台灣搞抱抱會，她笑說：「台灣好興o架，仲試過畀熱情女粉絲攬住錫頸，（咁男粉絲呢？）女仔比較『色魔』，啲男仔反而話唔使，嫌棄我咁！所以喺台灣未試過攬仔。」一向膽大的阿詩不怕搞抱抱會危險：「雖然我open，你睇我個樣就知安全，我食過吓夜粥，唔會有問題。」她笑言最大容忍度可讓粉絲錫錫面珠。
