Eason吹水唔抹嘴A貨氹阿徐

前晚Eason在澳門舉行《DUO 陳奕迅2010澳門演唱會》，其父陳裘大、老婆徐濠縈、女兒康堤、好友黃偉文及一眾小學同學等專程「過大海」捧場，難怪Eason興奮說：「今（前）日有好多朋友嚟咗！」深受父親影響的康堤，見Eason在台上又唱又跳，也有樣學樣在台下跳舞。演唱會尾聲時，Eason特別向父親所坐的位置大喊：「Daddy，I Love You。」

與露雲娜互爆瘀事

儘管有女兒在場，愛吹水的Eason照樣講有味笑話。他自稱聲音會持續沙啞，自責唱不到部分假音，不過他有「妙方」解窘：「用橡筋紮起某器官，（聲音）就會高啲，不過邊個器官唔好講，嘻嘻。」

Eason請得露雲娜擔任嘉賓合唱三首歌，並以「新人」來介紹這位身形圓潤的前輩：「佢係RC（Rowena Cortes），唔係JW（黎明新寵）或JM（Janice Man）。」Eason對露雲娜非常細心，幫她抹汗及整理耳機，可是他忍不住爆對方瘀事：「佢好專業，連綵排都係着呢件毛毛褸，不過成日甩毛，佢要不停咁吐毛。」露雲娜即尷尬得掩嘴笑，然後反擊取笑Eason「烏歪」:「佢好似Van仔佬。」

慶功宴上，Eason透露未能和家人留在澳門玩，因昨日又要起程往溫哥華、多倫多、三藩市及拉斯維加斯舉行美加巡迴個唱，直至廿九日才返港，亦沒有時間買聖誕禮物送給老婆，他笑言就算有亦不愛張揚。早前阿徐自爆獲他送過百萬鑽石頸鏈，Eason笑問：「咁高調？喺皇崗買之嘛！女人真易氹。（係咪呢份禮物最重手？）我成個人都送咗畀佢啦。」

Eason每次開騷都會在服飾及舞台花盡心思。

黃偉文、阿徐及康堤專誠到澳門捧Eason場。

自稱不是呷醋外父

對於阿徐指會留頸鏈給女兒，Eason又懷疑：「邊『等』（擺）得咁耐呀？」出名廿四孝爸爸的他自稱不是呷醋外父：「個女啲男友先要過班uncle嗰關先，陳子聰叔叔好大隻，謝霆鋒係最尾嗰關，要畀佢睥一睥先，梁漢文就最鬼馬。」