所謂人不風流枉少年，美國流行樂壇小天王Justin Bieber亦唔例外！年僅16歲的他已與多位女星傳緋聞。前日Bieber就被人影到與緋聞女友、迪士尼女星Selena Gomez拍拖食早餐！
Justin Bieber自出道以來緋聞女友不絕，之前就曾與懷疑精神有問題的Demi Lovato、菲律賓與墨西哥混血R&B女歌手Jasmine V及迪士尼女星Selena Gomez等先後傳過緋聞。而前晚Bieber聯同年紀比他大三歲的Selena及其他歌手，在費城舉行的聖誕騷上表演，同日早上二人就被人見到一同食pancake作早餐。有目擊者指二人在餐廳內手拖手之餘更有擁抱，Selena更翹住Bieber的手臂離開，十足情侶！
查實Bieber今年九月已被影到在車廂內咀Jasmine，而十月二人更相約在夏威夷出海遊船河。而日前Bieber上名嘴芭芭拉禾達絲的特備節目時，亦有提到咀Jasmine一事。他大方承認有咀過Jasmine，並說︰「件事只係偶然發生，唔係好古怪啫。我諗所有16歲嘅男仔都會咀女仔！」不過被芭芭拉問到二人是否正在拍拖？他就否認︰「只係咀！」
另外，最近熱爆YouTube，被封為「小小Bieber」的七歲小豆丁MattyB，日前有新搞作，他翻唱Katy Perry《Firework》的MV曝光，在MV中MattyB與Katy Perry等歌手見面，更即場在他們面前Rap番兩嘴，相當精靈。
文：外娛組