Baby戀情浮面晒幸福

昨日以Lanvin for H&M連身裙上陣出席《b+ab X Angelababy卡通肖像聖誕咭慈善禮盒發佈會》的Baby，跟本地著名設計師S.K.Lam合作設計以其肖像所造的卡通肖像慈善卡，收益扣除成本會捐給聯合國兒童基金會。

自言忙於在內地及台灣工作的Baby，說聖誕節也要在工作中度過，問到海綿蛋糕黃曉明豈不要過lonely Christmas？Baby即忍不住甜笑說：「唔知呀！（送聖誕禮物畀佢？）我好忙，買咗好多禮物畀同事交換，買咗按摩椅畀媽咪。（同海綿蛋糕開聖誕派對？）佢都要拍戲！」明顯Baby對黃曉明行蹤瞭如指掌。

祝福舊愛

早前Baby為慶祝黃曉明生日大搞校服派對，問是否感情已浮面，Baby又再度甜笑說：「我成日都幫朋友搞生日party，（但你哋喺派對態度親暱？）不如講番個公仔。」雖然Baby即轉話題，但對於不少藝人包括蔡卓妍和陳偉霆也感情浮面，Baby大方的祝福舊愛說：「佢哋都好幸福。（你都可以o架！）我一直都覺得自己好幸福。」

已有一個月不在港的Baby，令fans牽腸掛肚，一早在現場守候。

Baby直言有自己的卡通肖像感到開心，猶如見證囡囡出生一樣。

冇講大話

至於是否怕公開戀情影響黃曉明，Baby說：「冇諗咁多，只係想大家注意我工作多啲。（結婚先公開？）冇諗咁長遠，順其自然。」但當問到會否怕被指是大話精，Baby即緊張的說：「吓！我又冇講大話。」問到這是否代表承認戀情，Baby只是甜笑不語外，更說有機會都想和黃曉明合作拍戲，至於會否想飾演情侶或夫婦，她再冧笑說：「哎吔！冇諗過。（你哋外形襯唔襯？）我同佢睇嚟都幾後生！」

文：名人組