字圓其說：傅穎踏過崎嶇慢步人生路
人生有幾多個八年可以浪費？26歲的傅穎（Theresa）入行八年，除了啡髮、大眼con的日本look幫自己殺出一條血路外，最叫人記得的，就只有跟鄧麗欣（Stephy）的明爭暗鬥，還有與何韻詩的跨越斷背山最精彩。
口述：傅穎 筆錄：音樂組
鄧麗欣 Hi Bye friend
"Theresa入行就與鄧麗欣、吳雨霏等九個女仔合組Cookies，還以為她們由隊友變死敵，怎知，兩人從來都不是朋友！"
咁多年我發覺到一樣嘢，我同佢擺埋一齊，作用就係一單可觀娛樂新聞，其實大家各有各生活、世界，唔係同一個組合就要非常非常之好，始終每一個人都要講夾唔夾，就算喺屋企，都可以同家姐friend啲，同細佬有代溝，始終會有咁情況。
大家覺得我同Stephy唔係朋友就係敵人，其實朋友都分好多種，我有好知心、心對心、腸對腸嘅朋友，而佢係屬於口對口嘅朋友，淨係講：「Hi，今日點呀？」再深入啲真係唔係！可能我同佢成日畀人擺埋一齊講，啲人講爭一姐，但我冇諗過要做一姐，一姐對我嚟講唔係好勁嘅稱呼，唔實質，我本身冇諗。話我哋不和由07年自己轉造型、獨立發展開始講，大家當talking point，我冇乜深感受。
問我點形容佢？真係好難答，唔係特別了解佢，只覺得佢係一個好tough女仔，大家喺呢個圈子一定有見面機會，我會用舊同事嚟形容大家關係，其實真係好無奈！好多人都係舊同事，唔代表乜唔好，入面唔包括死敵。
談事業 經歷起與跌
"02年入行的Theresa，坦白說成績乏善可陳！反而「傅走音」卻街知巷聞，知恥近乎勇的她，轉公司後苦學唱歌和跳舞，踏出新天地。"
入行八年，我嘅事業路都幾精彩，高低起跌乜都有齊，一啲都唔平坦，諗番以前，自己好多嘢都唔識，覺得自己好青澀、撞好多板，畀人感覺我好cool、好寸，好多人誤解我，以前向前衝乜都唔理，依家放慢腳步，睇嘅嘢清楚咗、透徹咗，但團火仲喺度。
前幾個月聲帶有事，諗過唔做呢行，突然間情緒跌到好低位，因為挫折令我冇得唔放慢腳步，當你冇咗把聲，好多工作需要暫停，有一刻好灰心，停對我唔係一件好事，但呢段時間畀我諗好多嘢，名利如浮雲，開始諗人生最重要係身邊人，事業上無論幾高幾低，瞓落病床每個人一樣，以前生命只有事業，依家知道好多要珍惜，想有一個伴侶同我走完人生路。
說愛情 騙子與斷背
"Theresa拍過4、5次拖，除了自爆遇愛情騙子搞到滿城風雨外，還有就是與何韻詩的斷背情最曖昧。"
我拍過4、5次拖，曾經有男友話我喺愛情面前冇乜自信，成日擔心佢會走、有第二個女仔，我唔知關唔關父母離婚影響，好驚自己好投入一段感情，但其實我就係咁，令我傷過，受到一個唔認真對待！
自己蠢咗
佢同我一齊時有第二個，但佢掩飾得好好，幾個月見你一次，話自己好忙，我仲幫佢諗藉口，以為自己睇得好透，原來我同其他女仔一樣，因為愛情而去相信一啲大話，我係唔開心，覺得自己蠢咗！依家有時會見到佢，仲一齊做嘢添，不過我冇嘢，可能佢已經唔重要。
至於我同何韻詩傳斷背已經係N年前舊聞，佢冇追過我，自己身邊有好多同性戀朋友，但我唔係囉，我鍾意有男友錫，我同阿詩畀人講冇所謂，大家自己知係朋友囉，佢係比較了解我嘅朋友，唔係hi、bye朋友，我遇到愛情騙子都有同阿詩講，佢係第一個知嗰個人係邊個！
09年自己發生咁多嘢、咁唔開心、有抑鬱都係話畀阿詩知，佢係一個當我有事時想同佢傾訴嘅人，阿詩感覺似大姐姐，我喺佢心目中係小妹妹，初相識時佢仲話我諗嘢成日鑽牛角尖，佢同我講，你對人態度，人哋知真心定假意，咁耐以嚟受佢呢句說話影響，一直真心對人，自己好少戴面具做人，但啲人反而鍾意假嘢多過真嘢。
髮型：Vincy Pang@IL COLPO
化妝：Theresa Fu
服裝：Hysteric Glamour
場地：風月堂@奧海城