林保怡奪亞洲視帝 無綫冷待

名為《第十五屆亞洲電視大獎》於本月9日晚假新加坡舉行，來自兩岸三地及新加坡、泰國、印度等地電視作品亦有參賽，香港代表林保怡憑《掌上明珠》一劇奪視帝，心姐則憑《宮心計》贏得最佳女配角獎；而當地演員林慧玲及林繼堂則憑英語劇《門徒》奪視后及最佳男配角。

攞完獎再慶祝

保怡昨日自星洲凱旋歸來，無綫並未安排接機慶祝，保怡只是湊巧碰上接日本組合LUNA SEA的記者，才有機會獲「祝賀」及舉獎示人。對未受無綫重視一事，保怡說留待攞完獎回來再約同劇演員慶祝。但拍《掌》劇時傳出宣萱與商天娥不和，保怡笑說：「都唔知約唔約得齊人，咪叫番佢兩個囉。（你夾喺中間？）我EQ高。」監製林志華稱不清楚公司有甚麼慶祝安排：「恭喜保怡先，但公司慶祝嘅事我都唔知，要了解吓。」外事部副總監曾醒明昨日說，公司準備下月中一次過頒發一些獲國際性獎項作品，對未有安排接機慶祝，他說：「時間匆忙啫。」

忘記帶身份證

04年已憑《金枝慾孽》贏得視帝的保怡，今次榮升亞洲視帝，他說：「好似運動員為港爭光，起初冇乜嘢但上機就緊張到連身份證都唔記得帶，要用護照出境。（有過攞獎經驗啦？）04年視帝係香港啫，今次係全亞洲，唔同嘅！（點處理個獎？）要整個盒set起佢。」

文：影視組